កំពង់ឆ្នាំង៖ ខណៈដែលសេវាសុខាភិបាលឯកជននៅតែជាដៃគូដែលមិនអាចខ្វះបានជាមួយនិងសេវាសុខាភិបាលសាធារណៈរបស់រដ្ឋនោះ អភិបាលខេត្តកំពង់ឆ្នាំង ឯកឧត្តម ឈួរ ច័ន្ទឌឿន បានស្នើអោយគ្រប់សេវាសុខាភិបាលឯកជនទាំងអស់ក្នុងខេត្ត ត្រូវបង្កើនប្រសិទ្ធិភាពលើការថែទាំ និងព្យាបាល ជូនអតិថិជនប្រកបដោយគុណធម៌ សមធម៌ និង គោរពបាននូវក្រមសីលធម៌វិជ្ជាជីវៈគ្រូពេទ្យ ។
ការលើកឡើងរបស់ឯកឧត្តម ដូចនេះធ្វើឡើង នៅក្នុងឱកាសជួបជាមួយអ្នកប្រកបវិជ្ជាជីវៈវិស័យសុខាភិបាលឯកជន នៅមន្ទីរសុខាភិបាលខេត្តកំពង់ឆ្នាំង កាលពីរសៀលថ្ងៃទី១៥ ខែមករា ឆ្នាំ២០២០ ។
ឯកឧត្តម បានបន្តទៀតថា គ្រូពេទ្យត្រូវតែមានការទទួលខុសត្រូវខ្ពស់ ចំពោះការព្យាបាលអ្នកជំងឺដោយប្រុងប្រយ័ត្ន ហើយថែមទាំងមានចំណេះដឹងប្រកបដោយវិជ្ជាជីវៈខ្ពស់ថែមទៀត ដើម្បីសុវត្ថិភាពអាយុជីវិតរបស់ប្រជាពលរដ្ឋ ។ ការខ្វះខាត អសមត្ថភាព និងសីលធម៌ វិជ្ជាជីវៈ ការធ្វេសប្រហែស នៅពេលដែលថែទាំព្យាបាលអ្នកជំងឺ គឺអាចបង្កឲ្យគ្រោះថ្នាក់ដល់អាយុជីវិតមនុស្ស។ គ្រូពេទ្យត្រូវតែមានការប្រុងប្រយ័ត្នខ្ពស់ក្នុងការព្យបាលអ្នកជំងឺ ដោយមានស្មារតីទទួលខុសត្រូវខ្ពស់ផងដែរ។
គួរបញ្ជាក់ថា បច្ចុប្បន្នចំនួនសេវាសុខាភិបាលឯកជនក្នុងខេត្តកំពង់ឆ្នាំដែល មានច្បាប់អនុញ្ញាតត្រឹមត្រូវមានចំនួន ៤៨៤កន្លែង ៕
