នៅព្រឹកថ្ងៃទី០៨ មីនានេះ ក្រុមការងាររបស់ក្រសួងសុខាភិបាល បានដំណើរការផ្ទេអ្នកជំងឺកូវីដ-១៩ ចេញពីមណ្ឌលចត្តាឡីស័ករាជ ធានីភ្នំពេញនៅព្រែកព្នៅ មកទីតាំងសណ្ឋាគារ THE GREAT DUKE ដែលជាអតីតសណ្ឋាគារអាំងទែកុងទីណង់តាល់ បន្ទាប់ពីប្រែក្លាយទៅជាមន្ទីរពេទ្យព្យាបាលអ្នកជំងឺកូវីដ-១៩ កម្រិតស្រាល។
ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក និងជាអនុប្រធានគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩ បានបញ្ជាក់ថា ការដាក់ឱ្យដំណើរការទីតាំងសណ្ឋាគារ THE GREAT DUKE ដែលជាអតីតសណ្ឋាគារអាំងទែកុងទីណង់តាល់ ជាមន្ទីរពេទ្យសម្រាប់អ្នកជំងឺកូវីដ-១៩ កម្រិតស្រាល គឺដើម្បីផ្តល់លទ្ធភាពដល់ក្រសួងសុខាភិបាលក្នុងការប្រមូលផ្តុំធនធានមនុស្ស សម្ភារ បរិក្ខារ និងបច្ចេកទេសចាំបាច់មួយចំនួន បម្រើដល់ការ ជួយសង្គ្រោះដល់អាយុជីវិតមនុស្សឱ្យបានទាន់ពេលវេលា និងធានាទប់ស្កាត់ការរីករាលដាលកាន់តែធ្ងន់ធ្ងរនៃជំងឺនេះនៅក្នុងសហគមន៍។
គួរបញ្ជាក់ថា បន្ទាប់ពីទទួលបទបញ្ជាបន្ទាន់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ចាប់ពីល្ងាចថ្ងៃសៅរ៍ ទី៦ រហូតដល់ ម៉ោង ០២:៣០ រំលងអធ្រាត ឈានចូលថ្ងៃទី៨ ខែមីនា ឆ្នាំ២០២១ ក្រុមការងារគណៈកម្មការអន្តរក្រសួងដើម្បីប្រយុទ្ធនឹងជំងឺ កូវីដ-១៩ បានរៀបចំទីតាំងសណ្ឋាគារ THE GREAT DUK សណ្ឋាគារអាំងទែកុងទីណង់តាល់ អោយក្លាយទៅជាមន្ទីរពេទ្យសម្រាប់ពិនិត្យ ថែទាំ និងព្យាបាលអ្នកជំងឺកូវីដ-១៩ ដែលផ្ទេរចេញពីមណ្ឌលចត្តាឡីស័ករាជធានីភ្នំពេញ នៅព្រែកព្នៅ។
ទីតាំងអគារសណ្ឋាគារ THE GREAT DUKE ដែលប្រែក្លាយទៅជាមន្ទីរពេទ្យកម្រិតស្រាលព្យាបាលអ្នកជំងឺកូវីដ-១៩ អាចទទួលព្យាបាលអ្នកជម្ងឺបានប្រមាណ ៥០០នាក់៕
