កំពង់ឆ្នាំង ៖ ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង បានក្រើនរំលឹកដល់មន្ត្រីគ្រប់លំដាប់ថ្នាក់ ឲ្យខិតខំដោះស្រាយបញ្ហាប្រឈម និងសំណូមពរ របស់ប្រជាពលរដ្ឋនៅមូលដ្ឋានឲ្យមានប្រសិទ្ធិភាព។ ការក្រើនរំលឹករបស់ឯកឧត្តមដូចនេះ បានធ្វើឡើងនៅក្នុងកិច្ចប្រជុំផ្សព្វផ្សាយលទ្ធផលការងារប្រឡងប្រណាំង ការអនុវត្តគោលនយោបាយភូមិ ឃុំមានសុវត្តិភាព កាលពីព្រឹកថ្ងៃទី៥ ខែមីនា ឆ្នាំ២០២១ ។
ឯកឧត្តម បានបញ្ជាក់ថា មន្ត្រីអាជ្ញាធរគ្រប់លំដាប់ថ្នាក់ ត្រូវយកចិត្តទុកដាក់ពីទុក្ចកង្វល់ បញ្ហាប្រឈម និង សំណូមពររបស់ប្រជាពលរដ្ឋឲ្យបានទាន់ពេលវេលាប្រកបដោយស្មារតីទទួលខុសត្រូវខ្ពស់ ដើម្បី ទទួលបានការជឿទុកចិត្ត និងទទួលបាននូវភាពកក់ក្តៅដល់បងប្អូនប្រជាពលរដ្ឋ ។
ឯកឧត្តម អភិបាលខេត្ត បានបញ្ជាក់ទៀតថា ជាការពិតណាស់ សន្តិភាព ស្ថេរភាពនយោបាយ សន្តិសុខ សណា្តប់ ធ្នាប់សាធារណៈ ជាកក្តាគន្លឹះ ដែលផ្តល់ភាពអនុគ្រោះដល់ដំណើរការនៃការអភិវឌ្ឍន៍សេដ្ឋកិច្ច សង្គមកិច្ច និង វិស័យផ្សេងៗទៀត ឲ្យមានការរីកចម្រើន ស្របតាមកម្មវិធីនយោបាយ យុទ្ធសាស្ត្រចតុកោណ របស់រាជរដ្ឋាភិបាលកម្ពុជា ក្រោមការដឹកនាំប្រកបដោយគត្តិបណ្ឌិតរបស់សម្តេច អគ្គមហាសេនាបតីតេជោហ៊ុន សែន ។
គួរបញ្ជាក់ថា ខេត្តកំពង់ឆ្នាំង មានចំនួន៧០ឃុំ សង្កាត់ ចំពោះលទ្ធផលការងារប្រឡងប្រណាំង ការអនុវត្តគោលនយោបាយភូមិ ឃុំ មានសុវត្តិភាពនៅក្នុងឆ្នាំ២០២០ ចំណាត់ចំណាត់ប្រភេទ១ មានចំនួន៦៤ ឃុំ សង្កាត់ កើនឡើងចំនួន៥ឃុំនិង ចំណាត់ថ្នាក់ប្រភេទ ទី២ មានចំនួន៦ឃុំ សង្កាត់ ៕ អត្ថបទ៖ សុគន្ធារី
