ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង បានលើកឡើងថា សន្តិភាពគឺជាមូលដ្ឋានគ្រឹះមួយដ៏សំខាន់បំផុតសម្រាប់ការអភិវឌ្ឍន៍ប្រទេសជាតិ ហើយអំណោយផលនៃសន្តិភាព បាននិងកំពុងផ្តល់ឱ្យប្រជាជនកម្ពុជា នូវជីវភាពរស់នៅដ៏សុខសាន្ត ប្រកបដោយសុភមង្គល សិទ្ធិសេរី ភាព គ្រប់បែបយ៉ាង និងភាពសប្បាយរីករាយជួបជុំក្រុមគ្រួសារ ញាតិមិត្ត ក្នុងឱកាសបុណ្យតូចធំទាំងអស់ក្នុងមាតុភូមិកម្ពុជា ។
ការលើកឡើងរបស់ឯកឧត្តម ដូចនេះបានធ្វើឡើងនៅក្នុងពិធីសម្ពោធសមិទ្ធិផលនិងហេដ្ឋារចនាសម្ព័ន្ធនានា នៅក្នុងវត្តព្រះទ្វា ស្ថិតនៅក្នុង ស្រុករលាប្អៀរ ខេត្តកំពង់ឆ្នាំង កាលពីព្រឹក ថ្ងៃទី ០៥ ខែមករា ឆ្នាំ២០២០។
ឯកឧត្ដម បានបន្តថា ដោយសារប្រទេសមានសន្តិភាពបានអោយវិស័យពុទ្ធចក្រ និងអាណាចក្របានដើរទន្ទឹមគ្នា ។ ហើយការកសាងនូវហេដ្ឋា រចនាសម្ព័ន្ធ ក្នុងទីវត្តអារាម ក៏ជាផ្នែកមួយដែលរួមចំណែកទាក់ទាញកំណើនអ្នកទេសចរណ៍ជាតិ អន្តរជាតិចូលមកទស្សនាផងដែរ ។
ជាមួយគ្នានោះ ឯកឧត្តមអភិបាលខេត្ត ក៏បានកោតសរសើរ ចំពោះមន្ត្រីអាជ្ញាធរដែនដី ព្រះសង្ឃ គណ:កម្មការ អាចារ្យវត្ត និងប្រជាពលរដ្ឋក្នុង មូលដ្ឋានដែលបានរួបរួមសាមគ្គីគ្នា កសាងបាននូវសមិទ្ធិផលទាំងអស់នេះ៕
