កំពង់ឆ្នាំង៖ បុរសម្នាក់បានស្លាប់ភ្លាមៗនៅនឹងកន្លែងក្នុងហេតុការណ៍គ្រោះថ្នាក់ចរាចរណ៍មួយ ដែលបង្ករឡើងដោយម៉ូតូ២គ្រឿងបុកគ្នា ។ ហេតុការណ៍នេះបានកើតឡើង កាលពីវេលាម៉ោង១១ និង ៣០នាទី ថ្ងៃទី២៧ ខែកុម្ភ: ឆ្នាំ២០២១ នៅចន្លោះគីឡូម៉ែត្រលេខ៣៥ – ៣៦ លើកំណាត់ផ្លូវជាតិលេខ៥៣ ក្រោយវត្តខ្លុងពពក ឃុំខ្លុងពពក ស្រុកទឹកផុស ខេត្តកំពង់ឆ្នាំង ។
សមត្ថកិច្ច បានឲ្យដឹងថាជនរងគ្រោះឈ្មោះនង ផន ភេទប្រុស អាយុ៥៦ឆ្នាំ រស់នៅក្នុងភូមិ ឃុំកើតហេតុខាងលើ បានស្លាប់នៅនឹងកន្លែងកើតហេតុតែម្តង ។
សមត្ថកិច្ច មូលដ្ឋានបានឱ្យដឹងថា នៅមុនពេលកើតហេតុ ជនរងគ្រោះបានជិះម៉ូតូ ម៉ាកហុងដាសេ១២៥ ពណ៌ខ្មៅ ពាក់ស្លាកលេខ កំពង់ឆ្នាំង ១J-៤៨៣៩ ធ្វើដំណើរក្នុងទិសដៅពីត្បូងទៅជើងនៅពេលមកដល់ចំណុចកើតហេតុ ក៏ស្រាប់តែមានម៉ូតូ១គ្រឿងទៀត ម៉ាកហុងដាវ៉េវ គ្មានស្លាកលេខ ជាម៉ូតូសណ្តោងរឺម៉កដឹកគ្រឿងសំណង់ បើកបរដោយឈ្មោះសុខ ជាភេទប្រុស រស់នៅស្រុកបរិបូរណ៍ ធ្វើដំណើរក្នុងទិសដៅផ្ទុយគ្នាបានបុកពេញមួយទំហឹង បណ្តាលឱ្យជនរងគ្រោះស្លាប់ភ្លាមៗនៅកន្លែងកើតហេតុតែម្តង។
ក្រោយពេលកើតហេតុ ជនបង្ករត្រូវបាន សមត្ថកិច្ចធ្វើការឃាត់ខ្លួនចំណែកមធ្យោបាយបង្កត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកទឹកផុស ដើម្បីអនុវត្តបន្តទៅតាមនីតិវិធី ៕
