កំពង់ឆ្នាំង៖ ឯកឧត្តម ណៅ ធួក រដ្ឋលេខាធិការក្រសួងកសិកម្ម រុក្ខាប្រម៉ាញ់ និងនេសាទ បានប្រាប់មន្ត្រីជំនាញរដ្ឋបាលជលផលខេត្តកំពង់ឆ្នាំង ឲ្យបង្កើនការទប់ស្កាត់ និងបង្ក្រាបបទល្មើសនេសាទ គ្រប់ប្រភេទឲ្យបានជាប់ជាប្រចាំ។
ឯកឧត្តម ណៅ ធួក បានមានប្រសាសន៍ក្រើនរំលឹកដល់មន្ត្រីជំនាញបែបនេះ នៅក្នុងឱកាសដែលឯកឧត្តមអញ្ជើញចុះត្រួតពិនិត្យមើលស្ថានភាពបទល្មើសនេសាទ ក្នុងភូមិសាស្ត្រស្រុកកំពង់ត្រឡាច និងស្រុកជលគិរី ខេត្តកំពង់ឆ្នាំង កាលពីថ្ងៃទី៥ ខែតុលា ឆ្នាំ២០២០ ។
ឯកឧត្តមរដ្ឋលេខាធិការ បានមានប្រសាសន៍ថា សកម្មភាពល្មើសនេសាទ តែងតែកើតមានជាបន្តបន្ទាប់ ដូចនេះមន្ត្រីជំនាញត្រូវតែចុះត្រួតពិនិត្យមើលឲ្យបានជាប់ជាប្រចាំនិងត្រូវធ្វើការបង្ក្រាបជាកស្តែងឲ្យមានប្រសិទ្ធភាព ។
លោក លី ឡា នាយខណ្ឌរដ្ឋបាលជលផលកំពង់ឆ្នាំង បានឲ្យដឹងថា នៅក្នុងប្រតិបត្តិការដែលដឹកនាំដោយឯកឧត្តម ណៅ ធួក រដ្ឋលេខាធិការក្រសួងកសិកម្មរុក្ខាប្រម៉ាញ់និងនេសាទ លោកងិន ហ៊ុន ប្រធានមន្ទីរ កសិកម្មរុក្ខាប្រម៉ាញ់និងនេសាទខេត្តកំពង់ឆ្នាំង បានចុះទៅកាន់ចំណុចក្បាលកោះលង្វែក ខ្លាគ្រហឹម ស្តីបន្លិច បឹងធំ ក្នុងភូមិសាស្ត្រស្រុកកំពង់ត្រឡាច និងស្រុកជលគីរី ខេត្តកំពង់ឆ្នាំង ។
លោក លី ឡា បានឲ្យដឹងទៀតថា ចំពោះលទ្ធផលកម្លាំងជំនាញជលផលសម្រេចរុះរើនិងបំផ្លាញចោលនៅនឹងកន្លែងមានរបាំងស្បៃមុង២៤កន្លែង ប្រវែង៥៦០ ម៉ែត្រ លូស្បៃមុងចំនួន២៤មាត់ បង្គោល ចំនួន៣៧០ដេីម និង ចាក់លែងត្រីចម្រុះ ចំនួន១៥០គីឡូក្រាម៕
