កំពង់ឆ្នាំង ៖ កម្លាំងជំនាញរដ្ឋបាលជលផលកំពង់ឆ្នាំង ដឹកនាំដោយលោក លី ឡា បានសហការជាមួយកម្លាំងសមត្ថកិច្ចនិងមន្ត្រីអាជ្ញាធរមូលដ្ឋានចុះបង្ក្រាបបទល្មើស ក្នុងរដូវត្រីពងកូន និង ជារដូវបិទនេសាទ មិនអនុញ្ញាត្តឲ្យមានការចាប់ត្រី ដោយប្រើឧបករណ៍ ហាមឃាត់នោះឡើយ ។ ប្រតិបត្តិការណ៍បង្ក្រាបបទល្មើសនេសាទនេះធ្វើឡើងកាលពីថ្ងៃទី២៤ ខែសីហា ឆ្នាំ២០២០ នៅតាមដងទន្លេសាប ក្នុងភូមិសាស្ត្រស្រុកជលគិរី និងស្រុកកំពង់លែង ខេត្តកំពង់ឆ្នាំង ។
លោក លី ឡា នាយខណ្ឌរដ្ឋបាលជលផលកំពង់ឆ្នាំង បានឲ្យដឹងថា ប្រតិបត្តិការចែកចេញជា២ក្រុម ដែលក្រុមទី១ លោកដឹកនាំផ្ទាល់ សហការជាមួយគណបញ្ជាការឯកភាពស្រុក កំពង់លែង ប្រើប្រាស់កំលាំង ២៥នាក់មធ្យោបាយ្រណូត៨គ្រឿង បានចុះទៅកាន់ភូមិសាស្ត្រ ឃុំស្វាយរំពារ និង ឃុំសំរោងសែន ត្រង់ចំណុចទំនប់ស្រុក និង បាយឡៅ ដោយបានធ្វើការរុះរេីរបាំងសាច់អួនក្រឡាញឹក និង បំផ្លាញចោលនូវនឹងកន្លែងតែម្តង ។
ចំពោះក្រុមទី២ដឹកនាំដោយលោក សេង សុវណ្ណារិទ្ធិ កម្លាំងចូលរួមមានខណ្ឌរដ្ឋបាលជលផលកំពង់ឆ្នាំង និង ខណ្ឌរដ្ឋបាលជលផលកំពង់ចាម កងកម្លាំងសមត្ថកិច្វ ចុះតាមដងទន្លេត្រង់ចំណុចព្រែកឱម៉ាល់ ព្រែកស្ទឹងស្ងួត ព្រែកតារស់ ប្រើប្រាស់កម្លាំងសរុប២៦នាក់និងមធ្យោបាយកាណូត៥គ្រឿង បានប្រទះឃើញរបាំងស្បៃមុង និង របាំងផ្ជិតព្រែក ហើយបានធ្វើការរុះរើ និង បំផ្លាញចោលនៅនឹងកន្លែងតែម្តង។
លោក លី ឡា បានឲ្យដឹងថា ចំពោះលទ្ធផល ក្រុមទាំង២សម្រេចធ្វើការ រុះរើ របាំងសាច់អួនក្រឡាញឹក២៨កន្លែង ប្រវែង ១៤០០ម៉ែត្រ លបលូចំនួន៥៦មាត់ របាំងភ្ជិតព្រែក២កន្លែង ប្រវែង៣៥ម៉ែត្រ លបចំនួន៤គ្រឿង រុះរើរបាំងស្បៃមុង១២កន្លែង ប្រវែង ២៥០ម៉ែត្រ លូស្បៃមុងចំនួន១២មាត់ បង្គោលចំនួន៩៩០ដេីម និង បានចាក់លែងត្រីចម្រុះចូលក្នុងដែននេសាទវិញបានចំនួន៥៥ គីឡូក្រាមផងដែរ ៕
