កំពង់ឆ្នាំង ៖ សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស ព្រះមហាសង្ឃរាជ នៃព្រះរាជាណាចក្រកម្ពុជា កាលពីព្រឹកថ្ងៃទី៥ ខែកក្កដា ឆ្នាំ២០២០ បាននិមន្តជាព្រះរាជាធិបតីភាព ក្នុងពិធីប្រគេនប្រកាសនីយបត្រតែងតាំងព្រះចៅអធិការវត្ត និងស្រោចស្រពសុគន្ធវារី ប្រគេនព្រះចៅអធិការវត្តចំនួន២ នៅស្រុករលាប្អៀរ ខេត្តកំពង់ឆ្នាំង។ វត្តទាំង២នោះរួមមាន វត្តសម្តេចនន្ទង៉ែតសែនជ័យសត្ថារាម ក្នុងឃុំប្រស្នឹប និងវត្តបល្ល័ង្ករង្សី ក្នុងឃុំពង្រ។
សម្តេចព្រះអគ្គមហាសង្ឃរាជាធិបតីកិត្តិយសឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា បានមានព្រះរាជបន្ទូលថា ការប្រកាសនីយបត្រតែងតាំងព្រះចៅអធិកាវត្ត និង ទីប្រឹក្សា នាពេលនេះ គឺដើម្បីបំពេញអោយបានត្រឹមត្រូវនូវរចនាសម្ព័ន្ធ នៃការគ្រប់គ្រងដឹកនាំផ្នែកពុទ្ធសាសនា ដើម្បីដឹកនាំកសាងអភិវឌ្ឍន៍វិស័យព្រះពុទ្ធសាសនាអោយមានការរីកចម្រើន ថ្កុំថ្កើន រុងរឿងថែមទៀត ។
សម្តេចព្រះអគ្គមហាសង្ឃរាជាធិបតីកិត្តិយសឧទ្ទេសបណ្ឌិត មានព្រះរាជបន្ទូលបន្តថា វត្តអារាមជាទីជំរកអប់រំ ចរិយាធម៌ ដល់ពុទ្ធបរិស័ទ យុវជន ដែលជាទំពាំងស្នងឬសី្ស និង ជាឱកាសល្អក្នុងការរួបរួមគ្នា ដើមី្បថែរក្សាការពារ សុខសន្តិភាព សេចក្តីសុខសាន្ត សង្គមជាតិដោយប្រកាន់យក ព្រះពុទ្ធឱវាទជាប្រទីបបំភ្លឺផ្លូវ ក្នុងការអប់រំសីលធម៌ ចរិយាធម៌ សេចក្តីថ្នៃថ្នូរ សមនឹងទស្សនៈដែលថា ព្រះពុទ្ធសាសនាជាកម្លាំងដឹកនាំចរិយាធម៌ក្នុងសង្គម ។
សម្តេចព្រះអគ្គមហាសង្ឃរាជាធិបតីកិត្តិយសឧទ្ទេសបណ្ឌិត មានព្រះរាជបន្ទូលបន្តទៀតថា ក្នុងនាមជាថ្នាក់ដឹកនាំ ត្រូវមានព្រហ្មវិហារធម៌ទំាងបួន គឺមេត្តា ករុណា មុទិតា និង ឧបេក្ខា ព្រមទាំងមានការឯកភាពផ្ទៃក្នុង លះបង់អំពើអបាយមុខ ហើយត្រូវចាំថា បែកបាក់សាមគ្គី គឺស្លាប់ និងត្រូវខិតខំបំពេញតួនាទីភារកិច្ចជាមួយពុទ្ធបរិស័ទ ដើម្បីដឹកនាំវិស័យព្រះពុទ្ធសាសនា អោយរីកចម្រើនតទៅមុខទៀត ។
ជាមួយគ្នានោះ លោកស្រី ប៊ន សុភី អភិបាលរងខេត្តកំពង់ឆ្នាំង ក៏បានលើកឡើងដែរថា ក្រោមការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា បានធ្វើអោយប្រទេសជាតិមានសុខសន្តិភាពមានការីកចម្រើនជាបន្តបន្ទាប់ ។ ដោយឡែក ខេត្តកំពង់ឆ្នាំង ក្រោមការដឹកនាំរបស់ឯកឧត្តម ឈួរ ច័ន្ទឌឿន នាពេលបច្ចុប្បន្ន បានធ្វើអោយខេត្តមួយនេះមានការអភិវឌ្ឍន៍លើគ្រប់វិស័យទាំងពុទ្ធចក្រ និង អាណាចក្រ ។
គួរបញ្ជាក់ថា យោងតាមប្រកាសនីយបត្រ ទី១.គឺតែងតាំងភិក្ខុ ម៉ុច សៅលី ជាព្រះចៅអធិកាវត្តសម្តេចនន្ទង៉ែត សែនជ័យសត្ថារាម នៅឃុំប្រស្នឹប និង ជាទីប្រឹក្សាសម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស ព្រះមហាសង្ឃរាជនៃព្រះរាជាណាចក្រកម្ពុជា និងទី២.តែងតាំងភិក្ខុ នាង ភារុណ ជាព្រះគ្រូចៅ អធិការវត្តបល្ល័ង្ករង្សី នៅឃុំពង្រ ស្រុករលាប្អៀរ ខេត្តកំពង់ឆ្នាំង ។ ដោយឡែក នៅក្នុងឱកាសនោះ សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស ក៏បានប្រទានព្រះរាជអំណោយដល់ប្រជាពលរដ្ឋជាចាស់ជរាគ្មានទីពឹង ស្រ្តីក្រីក្រផងដែរ៕ 
