ប្រព័ន្ធធារាសាស្ត្រលំហាច ក្នុងស្រុកបរិបូណ៍ ខេត្តកំពង់ឆ្នាំង គិតមកទល់ពេលបច្ចុប្បន្ននេះ សម្រេចលទ្ធផលការងារសាងសង់បានប្រមាណជាង៨០ភាគរយហើយ។ នេះបើតាមការអោយដឹងពីក្រសួងធនធានទឹក និងឧតុនិយម នៅថ្ងៃ០៤ ខែមិថុនា ឆ្នាំ២០២០នេះ។
ក្រសួងធនធានទឹក និងឧតុនិយម បានអោយដឹងទៀតថា ទំហំការងាររបស់អនុគម្រោងប្រព័ន្ធធារាសាស្រ្ត លំហាច រួមមាន ៖ ការសាងសង់សំណង់ក្បាលហុងទឹក (Headworks) ចំនួន ០១កន្លែង ការសាងសង់ថ្មីសំណង់នាំទឹក (Intake) ចំនួន ០១កន្លែង ការសាងសង់ប្រឡាយមេបេតុងចំនួន ០១ខ្សែ ស្មើនឹងប្រវែង ១៦,៤០ គីឡូម៉ែត្រ ការសាង់សងប្រឡាយថ្នាក់ទី២ បេតុង ចំនួន ១៣ខ្សែ ស្មើនឹងប្រវែង ៤២,៥០ គីឡូម៉ែត្រ ការជួសជុល ប្រឡាយដោះទឹក ចំនួន ១៥ខ្សែ ស្មើនឹងប្រវែង ៥២,៩០ គីឡូម៉ែត្រ ការជួសជុល និងសាងសង់ប្រឡាយថ្នាក់ទី ៣ ចំនួន ៩៤ ខ្សែ ស្មើនឹងប្រវែង ៦២ គីឡូម៉ែត្រ ការសាងសង់សំណង់សិល្បការសរុបចំនួន ៥៥៧កន្លែង និងសាងសង់សំណង់អគារសហគមន៍កសិករប្រើប្រាស់ទឹក ចំនួន ០១កន្លែង។
គួរបញ្ជាក់ថា នៅថ្ងៃ០៤ ខែមិថុនា ឆ្នាំ២០២០នេះ ឯកឧត្តម ពេជ្រ វាសនា អនុរដ្ឋលេខាធិការ ក្រសួងធនធានទឹក និងឧតុនិយម និងជានាយកគម្រោងកែលម្អ និងស្តារឡើងវិញ ប្រព័ន្ធស្រោចស្រព និងប្រព័ន្ធដោះទឹកភាគខាងលិច បឹងទន្លេសាប ក៏បានដឹកនាំក្រុមការងារបច្ចេកទេស ត្រួតពិនិត្យដែលមានសមាសភាពចូលរួមពី តំណាងទីប្រឹក្សាបច្ចេកទេសគម្រោង, តំណាងក្រុមហ៊ុនសាងសង់អន្តរជាតិ មន្ត្រីអង្គភាពគ្រប់គ្រងគម្រោង និងប្រធានមន្ទីធនធានទឹក និងឧតុនិយមខេត្តកំពង់ឆ្នាំង ចុះត្រួតពិនិត្យការដ្ឋានសាងសង់ប្រព័ន្ធធារាសាស្ត្រ លំហាច ស្ថិតក្នុងស្រុកបរិបូណ៍ ខេត្តកំពង់ឆ្នាំង នេះផងដែរ ៕
