កំពង់ឆ្នាំង ៖ លោកជំទាវ ជូ ប៊ុនអេង ប្រធានក្រុមការងាររាជរដ្ឋាភិបាលចុះមូលដ្ឋានក្រុងកំពង់ឆ្នាំង និងជារដ្ឋលេខាធិការក្រសួងមហាផ្ទៃ បានជំរុញដល់ថ្នាក់ដឹកនាំ អាជ្ញាធរគ្រប់លំដាប់ថ្នាក់ នៅក្នុងក្រុងកំពង់ឆ្នាំង ត្រូវសហការយកចិត្តទុកដាក់ធ្វើការពិនិត្យ និងតាមដានសុខភាពជីវភាពរស់នៅរបស់ប្រជាពលរដ្ឋនៅតាមមូលដ្ឋានរបស់ខ្លួន ដើម្បីធានាបាននូវការទប់ស្តាត់រីករាល ដាលនៃជំងឺកូវីដ១៩នៅក្នុងសហគមន៍ ។
ការលើកឡើងរបស់លោកជំទាវ ជូ ប៊ុនអេង គឺធ្វើឡើងក្នុងឱកាសជួបសំណេះសំណាល និង ចែកអំណោយរបស់ព្រះគ្រូ កងសុផល ព្រះគ្រូសូត្រស្តាំវត្តអារញ្ញិការាមនិងសប្បុរសជនជិតឆ្ងាយ ដល់ប្រជាពលរដ្ឋចំនួន១២០គ្រួសារ មកពីភូមិចំនួន៦ក្នុងសង្កាត់កំពង់ឆ្នាំង ក្រុងកំពង់ឆ្នាំង កាលពីថ្ងៃទី២៩ ខែឧសភា ឆ្នាំ២០២០។
លោក យិន សាវ៉េន អភិបាលក្រុងកំពង់ឆ្នាំង បានអោយដឹងថា កន្លងមកនេះ អាជ្ញាធរក្រុងកំពង់ឆ្នាំង បានបន្តយក ចិត្តដាក់ក្នុងការដាក់វិធានការការពារទប់ស្កាត់ការីករាលដាលនៃជំងឺកូវិដ១៩ តាមរយៈ ម៉ូតរឺម៉កកង់បី រថយន្ត ដោយបានចាក់សារអប់រំពន្យល់ណែនាំអប់រំដល់ប្រជាពលរដ្ឋនៅគ្រប់មូលដ្ឋាន អំពីវិធានការនានារបស់ក្រសួងសុខាភិបាល ។
លោក យិន សាវ៉េន បានមានប្រសាសន៍អោយដឹងទៀតថា អំណោយដែលផ្តល់ជូនប្រជាពលរដ្ឋនា ពេលនេះ គឺបានមកពីការបរិច្ចាគនូវទេយ្យទានដោយផ្ទាល់ពីព្រះគ្រូកង សុផល ព្រះគ្រូសូត្រស្តាំ គង់នៅវត្តអារញ្ញិការាម និង សប្បុរសជនជិតឆ្ងាយ សរុបជាថវិកាជាង១៨លានរៀល ។ អំណោយទាំងនេះផ្តល់ជូនក្នុងមួយគ្រួសារមានអង្ករ១០គីឡូក្រាម មី១កេស ត្រីខ១យួរ ទឹកត្រី១យួរ ទឹកស៊ីអ៊ីវ១យួរ និង ថវិកា១ម៉ឺនរៀល ៕
