រថយន្តម៉ាក​កាមរីបាឡែន បើក​លឿន​បត់​មិន​ទាន់​ធ្លាក់​ចូល​អូរ​ក្រឡាប់​ផ្ងារ​ជើង មុខក្លោង​ទ្វារ​ចូល​​វត្តព្រះរាម​រង្សី ក្នុង​ស្រុក​​រលាប្អៀរ​

កំពង់ឆ្នាំង៖ មនុស្សពីរនាក់បានវាចេញពីរថយន្ត បន្ទាប់ពីរថយន្តនេះបានធ្លាក់ចូលទៅក្នុងប្រឡាយក្រឡាប់ផ្ងារជើង បន្ទាប់​ពីបើក​លឿន​ដល់ផ្លូវកោងបត់មិនទាន់ ។ ហេតុការណ៍នេះបានកើតឡើងនៅម៉ោងប្រមាណជា៥ល្ងាចថ្ងៃទី១៩ ខែមេសា
ឆ្នាំ​២០​២០ តាមបណ្ដោយផ្លូវជាតិលេខ៥៣ ចំណុចខាងមុខក្លោងទ្វារចូល​វត្តព្រះរាមរង្សី ស្ថិតនៅក្នុងភូមិព្រះរាមរង្សី ឃុំជ្រៃបាក់ ស្រុក​រលាប្អៀរ ខេត្តកំពង់ឆ្នាំង។

ប្រជាពលរដ្ឋ ដែលឃើញហេតុការណ៍ខាងលើនេះ​បានបញ្ជាក់ថា នៅមុនពេលកើតហេតុខាងលើនេះ​គាត់បានឃើញរថយន្ត​តូយ៉ូតាកាមរីបាឡែន​មួយគ្រឿងពណ៌ខ្មៅ ពាក់ស្លាកលេខ បន្ទាយមានជ័យ២A-៣៤០២ បើកបរដោយបុរសពីរនាក់ មិនស្គាល់​អត្តសញ្ញាណក្នុងល្បឿនលឿនធ្វើដំណើរ ក្នុងទិសដៅពីកើតទៅលិច ពេលមកដល់ចំ​ណុច​ផ្លូវបត់​ចូលទៅ​តាមខ្លោងទ្វារផ្លូវ​វត្ត​ព្រះរាមរង្សី តែដោយល្បឿនលឿនពេកទើបបត់មិនទាន់បណ្ដាលឲ្យ​រថយន្តធ្លាក់ ចូលទៅក្នុងប្រឡាយក្រឡាប់​ត្រាំទឹកតែម្ដង ។

ក្រោយពេលកើតហេតុក្រឡាប់រថយន្តនោះ គេឃើញបុរសពីរនាក់ដែលនៅក្នុងរថយន្តបានវាយបំបែកកញ្ចក់រថយន្ត ហើយ​បានវា​ចេញ​មកដោយមិនមានអ្នកណារងរបួសធ្ងន់ធ្ងរនោះទេ ៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង