ជនជាតិខ្មែរ​​​ដែល​វិល​ត្រឡប់​​ពី​ពិធី​សាសនា​​នៅម៉ាឡេស៊ី៧៩នាក់ ​បាន​​ធ្វើតេស្ត​សុខភាពទាំងអស់ហើយ ជា​លទ្ធ​ផល​មាន​២៣​នាក់​បាន​ឆ្លង​វីរុស​កូវីដ-​១៩​

  • ឯកឧត្តម អូស្មាន ហាស្សាន់ ទេសរដ្ឋមន្ដ្រីទទួលបន្ទុកបេសកកម្មពិសេស បាន​បញ្ជាក់​​ថា បងប្អូនខ្មែរទាំង៧៩នាក់ ដែល​បាន​ត្រឡប់​មកពីប្រទេសម៉ាឡេស៊ីវិញ ត្រូវបានពិនិត្យសុខភាពរបស់ពួកគាត់រួចរាល់អស់ហើយ ខណៈ​មាន​មនុស្ស​ចំនួន​២៣​នាក់ បានឆ្លងវីរុសកូដវី១៩។ ការបញ្ជាក់បែបនេះរបស់ឯកឧត្តមដូចនោះ បានធ្វើឡើងនៅក្នុងសន្និសីទសារព័ត៌មានបន្ទាន់មួយ ទាក់ទងនឹង​ផលប៉ះ​ពាល់​រ​បស់​វីរុសកូវីដ១៩ មកលើសហគមន៍ឥស្លាមនៅកម្ពុជា នារសៀលថ្ងៃទី២១ ខែមីនា ឆ្នាំ២០២០នេះ ។

    ឯក​ឧត្តម លើក​ឡើង​ថា អ្នក​ដែល​មាន​ផ្ទុក​វីរុស​កូវីដ​-១៩ ត្រូវ​បាន​ថែទាំ​និង​យកចិត្តទុក​ដាក់​យ៉ាង​ខ្លាំង ពីសំណាក់​ក្រុមគ្រូពេទ្យ នៅ​​តាម​មណ្ឌល​សុខភាព​នានា​ ដែល​ពួកគេ​កំពុង​តែ​សម្រាក​ព្យាបាល​ជំងឺ ក្រោមការតាមដានយ៉ាងដិតដល់ របស់​ក្រសួង​សុខា​ភិបាល​។ ហើយ​សូមប្រជាពលរដ្ឋខ្មែរទូទាំងប្រទេសកម្ពុជា ​កុំមានការព្រួយបារម្ភ ឱ្យ​សោះ​ចំពោះ​ការ​ផ្សព្វផ្សាយ​ព័ត៌មាន​មួយ​ចំនួន​ពាក់ព័ន្ធ​នឹងបងប្អូនខ្មែរទាំង៧៩នាក់នេះ ធ្វើដំណើរនៅខាងក្រៅ​ទៅកន្លែង​ផ្សេងៗ​ឱ្យ​សោះ។

    ជាមួយគ្នានោះ ឯកឧត្តម បានបញ្ជាក់ទៀតថា សម្រាប់អ្នកស្និទស្នាលជាមួយអ្នកផ្ទុកវីរុសទាំង២៣នាក់ខាងលើ ដែលរួម​មាន​ប្រពន្ធ កូន ទាំងក្រុមគ្រួសារនៅតាមផ្ទះ និងអ្នកដែលប្រាស្រ័យទាក់ទងជាមួយចំនួនប្រមាណជិត៣០០នាក់ ត្រូវបានក្រសួង​សុខាភិបាល​នាំយកមកធ្វើតេស្តសុខភាព ដែលជាលទ្ធផលមានអ្នកឆ្លងវីរុសកូវីដ-១៩ ចំនួន៥នាក់ប៉ុណ្ណោះ។

    គួរបញ្ជាក់ថា រហូតម៉ោង ១១យប់ ថ្ងៃទី ២០ មីនា ២០២០ កម្ពុជារកឃើញអ្នកជំងឺ COVID-19 សរុបទាំងអស់ចំនួន ៥១ករណី ៕

    ព័ត៌មាន​ទាក់​ទង

    ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង