ពេញ​មួយ​ឆ្នាំ​២០១៩ ​មាន​​អ្នក​​ដំណើរ​​ជាង​​៨​លាន​នាក់​ បាន​ប្រើប្រាស់​​សេវា​​ដឹក​​ជញ្ជូន​​សាធារណៈរថយន្តក្រុង​

រយៈ​ពេល​ពេញ​មួយឆ្នាំ​២០១៩ រដ្ឋាករ​ស្វយ័ត​ដឹក​ជញ្ជូន​សាធារណៈ​រថយន្តក្រុង បានធ្វើសកម្មភាព​ដឹក​ជញ្ជូ​ន​អ្នក​ដំណើរ​បាន​ចំនួន​ជាង៨លាននាក់ ក្នុងនោះអ្នកជិះបង់ប្រាក់មានចំនួនជាង ២លាន៧សែន នាក់ និងអ្នក​ជិះ​ឥត​បង់ប្រាក់​ចំនួនជាង​៥លាន​៤សែន​នាក់ ។


លោក អ៊ាន សុឃីម ប្រធានរដ្ឋាករ​ស្វយ័តដឹ​កជញ្ជូនសាធារណៈរថយន្តក្រុង បានឲ្យដឹងថា បច្ចុប្បន្ន​ដើម្បី​បង្ក​លក្ខណៈ​​ងាយ​ស្រួល​​ដល់​ប្រជាពលរដ្ឋ បានធ្វើដំណើរ​ទៅតាមជម្រើសគោលដៅ ប្រកបដោយសុវត្ថិភាព និង​កាត់​ប​ន្ថយកកស្ទះ​ចរាចរណ៍​រដ្ឋាករ​ស្វយ័តដឹកជញ្ជូនសាធារណៈ រថយន្តក្រុង បានពង្រីកសេវាដឹកជញ្ជូនកើនដល់ចំនួន១៣ខ្សែ ដោយ​ប្រើ​ប្រាស់​រថយន្ត​ក្រុង​សរុប ចំនួន២៣៥គ្រឿង ។

លោក បានបន្តថា រដ្ឋាករស្វយ័ត​ដឹកជញ្ជូន​សាធារណៈ​រថ​យន្តក្រុង ក៏បានរៀប​ចំប្រព័ន្ធ​គ្រប់គ្រងប្រតិបត្តិការ និង​ប្រព័ន្ធ​ APPលើ​​ទូរស័ព្ទដៃ តាមដានទីតាំងចលនាបម្លាស់ទីរបស់រថយន្តក្រុង ក្នុងប្រព័ន្ធទាំងនេះ ដើម្បី​បង្ក​លក្ខណៈ​ងាយ​ស្រួល​ទាំង​អ្នក​គ្រប់​​គ្រង​ប្រតិបត្តិ​ការ អ្នកបើកបរ និងអ្នកប្រើប្រាស់សេវា។ ពោលគឺ អាចបញ្ចៀសកុំឲ្យរថយន្តក្រុងពីរ ឬច្រើន​គ្រឿង​មក​ដល់​ក្នុង​ពេល​តែមួយ ហើយអ្នកប្រើប្រាស់សេវាវិញ អាចដឹងជាមុន អំពីពេលវេលាដែលរថយន្តក្រុងនឹងមកដល់ ដោយ​ពុំចាំ​បាច់​ចំណាយ​ពេលវេលារង់ចាំយូរនៅតាមចំណតរថយន្តក្រុងនោះទៀតឡើយ។

សូមជម្រាបថា រដ្ឋាករស្វយ័តដឹកជញ្ជូន​សាធារណៈរថយន្តក្រុង បាន​ដាក់​ឲ្យដំណើរ​ការ សេវាដឹកជញ្ជូន​សាធារណៈ ជូន​ប្រជា​ពល​រដ្ឋ បានចំនួន១៣ខ្សែ ប្រើប្រាស់រថយន្ត ២៣៥គ្រឿង និងមានអ្នកជិះ​រថយន្តក្រុងពី២ម៉ឺនទៅ៣ម៉ឺននាក់ក្នុងមួយថ្ងៃ។ រដ្ឋា​ករ​ស្វយ័ត​ដឹកជញ្ជូន​សាធារណៈរថយន្តក្រុង ក៏បានបំពាក់នូវម៉ាស៊ីនទូទាត់​ប្រាក់តាម​ប្រព័ន្ធអេឡិចត្រូនិកដោយប្រើប្រាស់កាត របស់​ធនាគារ នៅលើរថយន្តក្រុងទាំង​អស់ផងដែរ៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង