កំពង់ឆ្នាំង ៖ ប្រជាកសិករនៅខេត្តកំពង់ឆ្នាំង បានចាប់ផ្តើមភ្ជួរាស់ សាបព្រោះជាបណ្តើរៗហើយ ក្រោយពីមានភ្លៀងធ្លាក់ជាបន្តបន្ទាប់មកនោះ ។
លោក ងិន ហ៊ុន ប្រធានមន្ទីរកសិកម្មរុក្ខាប្រម៉ាញ់ និងនេសាទ ខេត្តកំពង់ឆ្នាំង បានឲ្យដឹងថា នៅឆ្នាំនេះ ខេត្តកំពង់ឆ្នាំង មានផែនការធ្វើស្រូវវស្សាលើផ្ទៃដី ១២២០០០ ហិកតា ។ ក្រោយពីមានភ្លៀងធ្លាក់ជាបន្តបន្ទាប់មកនោះ ប្រជាកសិករ បាននាំគ្នាភ្លួរាស់ និងសាបព្រោះ ជាបណ្តើរៗហើយ ។
លោកប្រធានមន្ទីរ បានឲ្យដឹងថា ការដាំដុះស្រូវវស្សាឆ្នាំនេះ បានលឿនជាងឆ្នាំមុន ដែលគិតត្រឹមថ្ងៃទី១៦ ខែឧសភា ឆ្នាំ២០២៣នេះ នៅទូទាំងខេត្តកំពង់ឆ្នាំង ប្រជាកសិករសម្រេចធ្វើដាំដុះបានចំនួន១១ ៣២៣ហិកតាហើយ ស្មើនឹង៩,២៨ភាគរយ លើផែនការចំនួន១២២ ០០០ហិកតា ។ ក្នុងនោះព្រោះស្រូវស្រាលបានចំនួន៦ ៩៤៩ ហិកតា ព្រោះស្រូវកណ្តាលបាន ៨៥៤ហិកតា និងព្រោះស្រូវធ្ងន់បាន ចំនួន៣ ៥២០ ហិកតា ។
លោក ងិន ហ៊ុន បានឲ្យដឹងទៀតថា ជាមួយនឹងការងារបង្ករបង្កើនផលស្រូវវស្សា ប្រជាកសិករបានដាំដំណាំរួមផ្សំ និងចិញ្ចឹមសត្វបន្ថែមផងដែរដើម្បីលើកកម្ពស់ជីវភាពក្នុងគ្រួសារ ឲ្យកាន់តែប្រសើរជាមុន ៕
