កំពង់ឆ្នាំង ៖ ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ និងជាប្រធានក្រុមការងារ រាជរដ្ឋាភិបាលចុះមូលដ្ឋាន ខេត្តកំពង់ឆ្នាំង បានក្រើនរំលឹកដល់អាជ្ញាធរស្រុកទឹកផុសគ្រប់លំដាប់ថ្នាក់ឲ្យបង្កើនការយកចិត្តទុកដាក់ ពង្រឹងការអនុវត្តគោលនយោបាយភូមិ ឃុំ មានសុវត្តិភាពឲ្យមានប្រសិទ្ធិភាព ។ ការក្រើនរំលឹករបស់ឯកឧត្តមបណ្ឌិតសភាចារ្យ បែបនេះ នៅក្នុងឳកាសចុះជួបសំណេះសំណាលជាមួយមន្ត្រីអាជ្ញាធរ គ្រប់លំដាប់ថ្នាក់ នៅក្នុងស្រុកទឹកផុស ខេត្តកំពង់ឆ្នាំង នាព្រឹកថ្ងៃទី១៤ ខែធ្នូ ឆ្នាំ២០២២ ។
ជាមួយគ្នានេះ ឯកឧត្តមបណ្ឌិតសភាចារ្យ អ៊ុក រ៉ាប៊ុន ក៏ណែនាំបន្ថែមដល់មន្ត្រីអាជ្ញាធរគ្រប់លំដាប់ថ្នាក់ ត្រូវយកចិត្តទុកដាក់បន្ថែមទៀត ចំពោះការផ្តល់សេវា តាមតម្រូវការជូនប្រជាពលរដ្ឋឲ្យបានល្អ ។ ដោយឡែកមន្ត្រីក្រុមការងារ ត្រូវបន្តចុះមូលដ្ឋាន ជួបជាមួយប្រជាពលរដ្ឋ ស្វែងយល់ពីតម្រូវការចាំបាច់របស់ពួកគាត់ ទទួលយកនូវសំណូមពរនិងជួយដោះស្រាយ រាល់បញ្ហាដែលបានកើតឡើងឲ្យបានទាន់ពេលវេលា ។
គួរបញ្ជាក់ថា នៅក្នុងឳកាសនោះ ឯកឧត្តម បណ្ឌិតសភាចារ្យ អ៊ុក រ៉ាប៊ុន ក៏បានផ្តល់ជូនអង្ករចំនួន១០តោន ដល់រដ្ឋបាលឃុំទាំង៩ និងស្រុកទឹកផុសផងដែរ ៕
