ឧត្តម​សេនីយ៍ឯក ហ៊ុន ម៉ាណែត ជំរុញ​ឱ្យ​កង​យោធ​ខេម​រភូមិន្ទ ត្រូវបំពេញភារកិច្ចស្រប​តាម​រដ្ឋធម្មនុញ្ញ ច្បាប់ និង​នយោ​បាយ​ការពារជាតិ​របស់​កម្ពុជា​

  • ឯកឧត្តម ឧត្តមសេនីយ៍​ឯក ហ៊ុន ម៉ាណែត អគ្គមេ​បញ្ជាការរង​នៃកងយោធពល​ខេរមភូមិន្ទ មេបញ្ជា​ការកងទ័ព​ជើងគោក បាន​ជំរុញ​ឱ្យកង​យោធ​ខេមរ​ភូមិន្ទ បន្តប្រកាន់​យកការ​បំពេញ​តួនាទី និងភារកិច្ចស្រប​តាម​រដ្ឋធម្មនុញ្ញ ច្បាប់​ និង​នយោបាយ​ការពារ​ជាតិ​របស់​កម្ពុជា​ ដើម្បី​សម្រេច​បាន​សមិទ្ធិផល​កាន់​តែល្អប្រសើរ​ជូន​ជាតិ ប្រជា​ជន និង​មាតុភូមិ​។

    ​ការជំរុញ​របស់​ឯកឧត្តម ​ឧត្តមសេនីយ៍ឯក ដូចនេះ​បានធ្វើឡើង​ក្នុង​ពិធីបូក សរុប​លទ្ធផល​ការងារ​យោធា​សន្តិសុខ ​ឆ្នាំ២០១៩ និង​ផ្សព្វផ្សាយ​ផែន​ការ​​សកម្មភាព​ការងារ​យោធា​សន្តិសុ​ខ​ឆ្នាំ២០២០ របស់​យោធភូមិ​ភាគ​ទី៥​ នៅ​ខេត្ត​បាត់​ដំបង ​កាល​ថ្ងៃទី​១០ ខែកុម្ភៈ​ ឆ្នាំ២០២០​។​

    ជាមួយគ្នានោះ ឯកឧត្តម ឧត្តមសេនីយ៍ឯក ក៏បានកោត​សរសើរ និងវាយ​តម្លៃខ្ពស់​ចំពោះ​កិច្ចខិត​ខំ ប្រឹងប្រែង​របស់​យោធ​ភូមិ​ភាគ​ទី៥ ដែល​​ពេញ​មួយ​​ឆ្នាំ២០១៩ កន្លងទៅ បានយកចិត្តទុកដាក់បំពេញ ភារកិច្ចប្រកបដោយ​ការទទួល​ខុសត្រូវ​ខ្ពស់ ក្នុងការ​ការពារ​ឯករាជ្យ អធិបតេយ្យ និង​បូរណ​ភាព​ទឹកដី ការធានានូវសន្តិភាព ស្ថិរភាព សន្តិសុខ និងសណ្តាប់ធ្នាប់សាធារណៈបានល្អប្រសើរ និងការកសាង ពង្រឹង​អង្គភាព​រឹងមាំ​លើ​គ្រប់​វិស័យ ក៏ដូចជាការចូលរួម​ចំណែ​ក​ក្នុងការ អនុវត្តផែនការ​កែទម្រង់ កងយោធ​ពលខេម​រភូមិន្ទ ដែល​កំពុង​ដំណើ​រការ។​

    ឯកឧត្តម ឧត្តមសេនីយ៍ឯក បន្ថែមទៀតថា សមិទ្ធផល​ការងារ​ទាំងនេះ ស្តែងឱ្យ​ឃើញ អំពីកិច្ច​ខិតខំ ប្រឹងប្រែង​ប្រកប​ដោយ​ពលិកម្ម និងការ​ប្តេជ្ញា​​ចិត្ត​របស់​មេបញ្ជាការ មេបញ្ជាការរង គ្រប់​លំដាប់ថ្នាក់ នាយ​ទាហាន នាយទាហានរង និងពល​ទាហាន ទូទាំង​យោធ​ភូមិ​ភាគ​ទី៥ បាន​ខិត​ខំ​រួប​រួម​គ្នា សម្រេច​បានក្នុងរយៈ​កាលកន្លង​មកនេះ ហើយ​សង្ឃឹមយ៉ាង​មុតមាំថា ថ្នាក់​ដឹកនាំ ព្រមទាំង​យោធិន​ទូទាំង​យោធ​ភូមិភាគ​ទី៥ នឹង​បន្ត​ប្រ​កាន់​ខ្ជាប់នូវស្មារតី និងគោល​ការណ៍​ទាំងនេះ ដើម្បីធានា​បាន​​នូវ​និរន្តរភាព ការងារ និងការរីក​ចម្រើន​របស់យោធភូមិ​ភាគបន្ត​ទៅមុខ​ទៀត៕

    ព័ត៌មាន​ទាក់​ទង

    ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង