កំពង់ឆ្នាំង ៖ ឯកឧត្តមបណ្ឌិត អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ និង ជាប្រធានក្រុមការងារ របស់រាជរដ្ឋាភិបាលចុះមូលដ្ឋានខេត្តកំពង់ឆ្នាំង បានជំរុញទៅកាន់មន្ត្រីជំនាញនិងអាជ្ញាធរនៅក្នុងខេត្តកំពង់ឆ្នាំង ឲ្យបង្កើនការយកចិត្តទុកដាក់ក្នុងការបម្រើសេវាសាធារណៈ និង រួមសហការគ្នាដោះស្រាយបញ្ហាប្រឈមជូនប្រជាពលរដ្ឋនៅគ្រប់មូលដ្ឋានឲ្យមានប្រសិទ្ធភាព ។
ការជំរុញរបស់ឯកឧត្តមដូចនេះបានធ្វើឡើងនៅក្នុងកិច្ចប្រជុំបូកសរុបលទ្ធផលការងារនិងលើកទិសដៅការងារសម្រាប់អនុវត្តបន្តរបស់ក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង កាលពីព្រឹកថ្ងៃទី១០ ខែកុម្ភះ ឆ្នាំ២០២០ ។
ឯកឧត្តម បានប្តថា ការផ្តល់សេវាសាធារណៈ ជូនប្រជាពលរដ្ឋគឺត្រូវធ្វើស្របតាមអភិក្រមធ្វើអោយបាន ធ្វើអោយលឿន និង ធ្វើឲ្យមានប្រសិទ្ធភាព សំដៅធ្វើឲ្យប្រជាពលរដ្ឋមានការទុកចិត្ត ជឿជាក់និងគាំទ្ររាជរដ្ឋាភិបាល ។
គួរបញ្ជាក់ថា កិច្ចប្រជុំបូកសរុបលទ្ធផលការងារឆ្នាំ ២០១៩ និងលើកទិសដៅការងារអនុវត្តបន្តរបស់ក្រុមការងាររាជរដ្ឋាភិបាលចុះមូលដ្ឋាន នាព្រឹកមិញនេះ ធ្វើឡើងដើម្បីត្រួតពិនិត្យ និងគាំទ្រការអនុវត្តកម្មវិធី នយោបាយ និងយុទ្ធសាស្រ្ដចតុកោណ ដំណាក់កាលទី ៤ របស់រាជរដ្ឋាភិបាលកម្ពុជានៅខេត្តកំពង់ឆ្នាំង ៕
