កំពង់ឆ្នាំង ៖ នៅថ្ងៃទី២៥ ខែមិនា ឆ្នាំ២០២២នេះកម្លាំងសមត្ថកិច្ចចម្រុះ បានចុះរុះរើបំផ្លាញចោលបទល្មើសរបាំងសាច់អួន និង សម្រាស់ ជាង៤០កន្លែងទៀត នៅក្នុងភូមិសាស្ត្រខេត្តកំពង់ឆ្នាំង ។
លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់និងនេសាទខេត្តកំពង់ឆ្នាំង បានឲ្យដឹងថា នៅថ្ងៃទី២៥ មិនានេះ កម្លាំងចម្រុះបានចេញធ្វើសកម្មភាពបង្ក្រាបបទល្មើសនេសាទជាបន្តទៀត ក្នុងភូមិសាស្ត្រស្រុកគោលដៅចំនួន៣ គឺស្រុកជលគិរី ស្រុកកំពង់លែង និង ស្រុកបរិបូរណ៍ ។
លោក ងិន ហ៊ុន បានឲ្យដឹងថា ចំពោះលទ្ធផលផលកម្លាំងចម្រុះ សម្រេចរុះរើបំផ្លាញចោល នៅនឹងកន្លែងមានរបាំងសាច់អួនចំនួន១២កន្លែង ប្រវែង៨០០ម៉ែត្រ បង្គោល៤៥០ដើម លូសាច់អួនចំនួន១៥លូ,រុះរើសម្រាស់ចំនួន៣១កន្លែង ទំហំ៨៥០ម៉ែត្រក្រឡា បង្គោល៤៣៥ដើម និង ឧបករណ៍អួនចំនួន៣វង់ ។
សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានចេញបទបញ្ជាដាច់ណាត់ ឱ្យអាជ្ញាធរនិងកម្លាំងសមត្ថកិច្ចគ្រប់ជាន់ថ្នាក់ ជាពិសេសអភិបាលខេត្ត ជុំវិញបឹងទន្លេសាប រួមទាំងកម្លាំងនគរបាល មន្ត្រីរដ្ឋបាលជលផល រួមគ្នាបង្ក្រាប និង លុបបំបាត់បទល្មើសនេសាទទាំងអស់នៅលើផ្ទៃបឹងទន្លេសាប ក្រោយពីសកម្មភាពនេសាទខុសច្បាប់និងការកាប់ទន្ទ្រានដីព្រៃលិចទឹកនៅបន្តកើតមាន។
បទបញ្ជាសារជាថ្មីរបស់សម្តេចតេជោ ហ៊ុន សែន បានធ្វើឡើងនៅក្នុងពិធីបិទសន្និបាតបូកសរុបការងារ របស់ក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី២៣ ខែមីនា ឆ្នាំ២០២២ ៕
