កំពង់ឆ្នាំង ៖ ក្រោយពីមានបទបញ្ជារបស់សម្តេចតេជោ ហ៊ុន សែន នៅថ្ងៃទី២៤ ខែមិនា ឆ្នាំ២០២២នេះកម្លាំងសមត្ថកិច្ចចម្រុះរបស់ខេត្តកំពង់ឆ្នាំង រួមមានកម្លាំងជលផល កម្លាំងនគរបាល និង កម្លាំងអាជ្ញាធរមូលដ្ឋាន បានចេញប្រតិបត្តិការបង្ក្រាបបទល្មើសនេសាទ តាមដងទន្លេសាប នៅក្នុងភូមិ សាស្ត្រស្រុកចំនួន៣ គឺស្រុកជលគិរី ស្រុកកំពងលែង និង ស្រុកបរិបូណ៌ ។
លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់និងនេសាទខេត្តកំពង់ឆ្នាំង បានឲ្យដឹងថា នៅថ្ងៃទី២៤ មិនានេះ កម្លាំងចម្រុះសរុបជា១០០នាក់ បានចេញធ្វើសកម្មភាពបង្ក្រាប នៅ៤គោលដៅ គឺនៅស្រុកជលគិរី ១គោលដៅ ស្រុកកំពង់លែង១គោលដៅ និង ស្រុកបរិបូរណ៍ ២គោលដៅ ។
លោកងិន ហ៊ុន បានឲ្យដឹងថា ចំពោះលទ្ធផលផលកម្លាំងចម្រុះ សម្រេចរុះរើបំផ្លាញចោល នៅនឹងកន្លែងមានរបាំងសាច់អួនចំនួន២៧កន្លែង ប្រវែង
២ ២០០ម៉ែត្រ បង្គោល៨៥០ដើម លូសាច់អួនចំនួន៣៤លូ សម្រាស់ចំនួន៧កន្លែង ទំហំ៥៦០ម៉ែត្រក្រឡា និង បង្គោល១៣០ដើម ។
នៅក្នុងប្រតិបត្តិការបង្ក្រាបបទល្មើសនេសាទ ទ្រង់ទ្រាយធំនេះ មិនមានឃាត់ខ្លួនជនណាម្នាក់ឡើយពីព្រោះពួកគេបានគេចខ្លួន នៅមុនពេលដែលសមត្ថកិច្ចទៅដល់ ៕
