កំពង់ឆ្នាំង ៖ លោក ឈឹម វុទ្ធា អភិបាលរងខេត្តកំពង់ឆ្នាំង បានរំលឹកដល់មន្ត្រីអាជ្ញាធរ និងសមត្ថកិច្ចដែលពាក់ព័ន្ធ ក្នុងស្រុកកំពង់លែងត្រូវបង្កើនការយកចិត្តទុកដាក់ក្នុងការរៀបចំសណ្តាប់ធ្នាប់និងរក្សាសន្តិសុជូនប្រជាពលរដ្ឋឲ្យបានល្អ ក្នុងឳកាសនៃពិធីវុណ្យកាន់បិណ្ឌ ភ្ជំបិណ្ឌនេះ ។
លោក អភិបាលរងខេត្តកំពង់ឆ្នាំង បានមានប្រសាសន៍រំលឹកដល់មន្ត្រី នៅក្នុងស្រុកកំពង់លែងបែបនេះ នៅក្នុងសិក្ខាសាលាសមាហរណកម្មកម្មវិធីវិនិយោគ៣ឆ្នាំរំកិល នាថ្ងៃទី៣ ខែតុលាឆ្នាំ២០២៣ ។
លោកឈឹម វុទ្ធា បានមានប្រសាសន៍ថា ដោយសារតែពេលនេះជារដូវកាន់បិណ្ឌ មានប្រជាពលរដ្ឋជាច្រើនបានធ្វើដំណើរទៅកាន់ទីអារាមនានា ដើម្បីប្រារព្វពិធីទៅតាមទំនាមទម្លាប់ និងប្រពៃណីរបស់ដូនតាយើង ។ ដូចនេះមន្ត្រីអាជ្ញាធរ និងសមត្ថកិច្ចដែលពាក់ព័ន្ធ ត្រូវតែយកចិត្តទុកដាក់លើបញ្ហាសណ្តាប់ធ្នាប់ និងសន្តិសុខជូនប្រជាពរដ្ឋជាចំបង ។
លោក អភិបាលរងខេត្តកំពង់ឆ្នាំង បានបញ្ជាក់ទៀតថា សិក្ខាសាលាដែលរៀបចំធ្វើឡើងនាពេលនេះ ក្នុងគោលបំណងកៀរគរធនធាន ពីគ្រប់ប្រភព សម្រាប់គាំទ្រគម្រោង វិនិយោគអា ទិភាព ដែលបានលើកឡើងដោយ រដ្ឋបាល ស្រុក និងឃុំ ។ ពង្រឹងកិច្ចសហការអនុវត្តគម្រោង ជាមួយភាគីពាក់ព័ន្ធនានា ក្នុងការដោះស្រាយបញ្ហាអាទិភាពជូនប្រជាពលរដ្ឋ នៅមូលដ្ឋាន។ សម្របសម្រួលឲ្យគម្រោងសកម្មភាពអភិវឌ្ឍន៍ ដែលបានលើកឡើងឲ្យមានភាពស៊ីសង្វាក់គ្នា ទៅនឹងគោលនយោបាយវិស័យជំនាញ របស់រាជរដ្ឋាភិបាល ៕
