កំពង់ឆ្នាំង ៖ ឯកឧត្តមអម សុភា អភិបាលរងខេត្តកំពង់ឆ្នាំង បានថ្លែងថា អតីតយុទ្ធជនកម្ពុជា មានគុណបំណាច់យ៉ាងធំធេងដើម្បីបុព្វហេតុជាតិ មាតុភូមិ ជាទីស្នេហា នៃយើង ។ ឯកឧត្តម អម សុភា បានមានប្រសាសន៍បែបនេះ នៅក្នុងឱកាសដែលឯកឧត្តម អញ្ជើញជាអធិបតីក្នុងទិវាអតីតយុទ្ធជនកម្ពុជា លើកទី១៤ នាព្រឹកថ្ងៃទី១៥ ខែកក្កដា ឆ្នាំ២០២១ នៅមន្ទីរសង្គមកិច្ច អតីតយុទ្ធជននិងយុវនិតិសម្បទា ខេត្តកំពង់ឆ្នាំង ។
ឯកឧត្តមអភិបាលរងខេត្ត បានមានប្រសាសន៍បន្តថា អតីតយុទ្ធជនបានរួមចំណែកយ៉ាងសំខាន់ ក្នុងកិច្ចការពារបូរណភាពទឹកដី ការកសាងសុខសន្តិភាពនិងស្ថិរភាពសង្គម សម្រាប់ព្រះរាជាណាចក្រកម្ពុជា សំដៅធានាឲ្យមានការអភិវឌ្ឍន៍សេដ្ឋកិច្ចនិងសង្គម ដើម្បីជាឧត្តមប្រយោជន៍ សម្រាប់ជាតិមាតុភូមិ និង ប្រជាជនកម្ពុជា ។
ឯកឧត្តម អម សុភា អភិបាលរងខេត្តកំពង់ឆ្នាំង បានមានប្រសាសន៍បញ្ជាក់ទៀតថា ទិវាអតីតយុទ្ធជនកម្ពុជា ត្រូវបានប្រារព្វធ្វើឡើងជារៀងរាល់ឆ្នាំ ក្នុងគោលបំណងផ្សព្វផ្សាយឲ្យប្រជាពលរដ្ឋទូទាំងប្រទេស បានយល់ដឹងកាន់តែច្បាស់និងទូលំទូលាយ បន្ថែមទៀតអំពីអតីតយុទ្ធជន ។
លោក ថោង ចំរើន ប្រធានមន្ទីរសង្គមកិច្ចអតីតយុទ្ធជន និង យុវនិតិសម្បទា និង ជាអនុប្រធានប្រចាំការ នៃគណ:កម្មាធិការសមាគម អតីតយុទ្ធជនកម្ពុជា ខេត្តកំពង់ឆ្នាំង បានឲ្យដឹងថា គិតត្រឹមខែមិថុនា ឆ្នាំ២០២១នេះ ខេត្តកំពង់ឆ្នាំងមានសមាជិកសមាគមសរុបចំនួន២ ៩៧៩នាក់ ក្នុងនោះជនពិការចំនួន៩៩៨នាក់ និវត្តន៍ជនចំនួន៨១៥នាក់ ជនបាត់បង់សមត្ថភាពការងារចំនួន៥២នាក់ ជនពិលីចំនួន៩៤៩ជនមរណចំនួន១៦៦គ្រួសារ ។
ក្នុងពេលនោះឯកឧត្តម អម សុភា អភិបាលរង ខេត្តកំពង់ឆ្នាំង បានឧបត្ថម្ភដល់សមាជិកដែលបានចូលរួម ចំនួន៥០នាក់ក្នុងម្នាក់ៗ ទទូលអង្ករចំនួន២៥គីឡូក្រាមគុយទាវ២ប្រអប់ ទឹកត្រី១យួរ ត្រីខ ១០កំប៉ុង ប៊ីចេង១កញ្ចប់និងថវិកាចំនួន២ម៉ឺនរៀល ៕
អត្ថបទ និងរូបភាព៖ និវឌ្ឍន៍
