រដ្ឋបាលខេត្តកំពង់ឆ្នាំង នៅថ្ងៃទី២២ ឧសភានេះ បានប្រកាសរកឃើញករណីវិជ្ជមានកូវីដ-១៩ ចំនួន ១ករណីថ្មីបន្ថែមទៀត គឺឈ្មោះ វ៉ៃ បុនលាភ ភេទប្រុស អាយុ ១៨ឆ្នាំ មានអាស័យដ្ឋាននៅភូមិត្រពាំងបួន ឃុំស្វាយ ស្រុកសាមគ្គីមានជ័យ ខេត្ត កំពង់ឆ្នាំង។
រដ្ឋបាលខេត្តកំពង់ឆ្នាំង បានអោយដឹងថា ឈ្មោះ វ៉ៃ បុនលាភ ភេទប្រុស ជាពលករត្រឡប់មកពីប្រទេសថៃតាមច្រកអូស្មាច់ ធ្វើដំណើរតាមរថយន្តកងទ័ព មានរួមដំណើរចំនួន ៨នាក់ មកដល់មណ្ឌលចត្តាឡីស័កសាលាគំរូក្រុងនៅយប់ថ្ងៃទី១៩ ខែឧសភា ឆ្នាំ២០២១។ នៅថ្ងៃ ទី២០ ខែឧសភា ឆ្នាំ២០២១ បានយកសំណាក ហើយជាលទ្ធផលគឺវិជ្ជមានកូវីដ-១៩។ បច្ចុប្បន្ន អ្នកជំងឺ ត្រូវបានដាក់ឱ្យសម្រាកព្យាបាលនៅមន្ទីរពេទ្យខេត្តកំពង់ឆ្នាំង។
គួរបញ្ជាក់ថា ក្នុង”ព្រឹត្តិការណ៍សហគមន៏ ២០កុម្ភៈ” ខេត្តកំពង់ឆ្នាំង បានរកឃើញអ្នកវិជ្ជមានកូវីដ-១៩ សរុបចំនួន ៧៥នាក់។ ក្នុងនោះមាន អ្នកជាសះស្បើយសរុប ២៩នាក់ កំពុងសម្រាកព្យាបាលសរុបចំនួន ៤៤នាក់ និងអ្នកស្លាប់ចំនួន ២នាក់។
