កំពង់ឆ្នាំង៖ ក្នុងរយះពេលពេញមួយខែវិច្ឆិកា ឆ្នាំ២០២១នេះ អាជ្ញាធរខេត្តកំពង់ឆ្នាំង បានចុះដោះស្រាយទំនាស់ និង សំណូមពរជូនប្រជាពលរដ្ឋនៅតាមមូលដ្ឋាននានាបាន ចំនួន៥៤៩ ករណី ខណៈនៅសល់ចំនួន១៧៤ករណីទៀត នឹងត្រូវបន្តដោះស្រាយនៅក្នុងខែធ្នូ ។នេះបើយោងតាមរបាយការណ៍ របស់ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង នៅក្នុងកិច្ចប្រជុំបូកសរុបលទ្ធផលយុទ្ធនាការដោះស្រាយទំនាស់ និងសំណូមពរជូនប្រជាពលរដ្ឋ នាព្រឹកថ្ងៃទី៣០ ខែវិច្ឆិកា ឆ្នាំ២០២១ ។
ឯកឧត្តម អភិបាលខេត្តកំពង់ឆ្នាំង បានឲ្យដឹងថា ចំពោះបណ្តឹងនិងសំណូមពររបស់ប្រជាពលរដ្ឋសរុបទាំងអស់មានចំនួន៧២៣ករណី ក្នុងនោះទំនាស់ក្នុងវិស័យដីធ្លីមានចំនួន៣៩៦ករណី ទំនាស់ក្នុងគ្រួសារមានចំនួន១៣០ករណី ទំនាស់ពាក្យសំដី បិទផ្លូវ ជំពាក់ប្រាក់ មិនអនុវត្តកិច្ចសន្យាផ្សេងៗចំនួន២៣ករណី សំណើនិងសំណូមពរចំនួន១៤៥ករណី ។
ជាមួយគ្នានេះ ឯកឧត្តម បណ្ឌិតសភាចារ្យ អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឋន៍ជនបទ និង ជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង បាន កោតសរសើរចំពោះរដ្ឋបាលខេត្តកំពង់ឆ្នាំង ដែលបានខិតខំរៀបចំនូវយន្តការដោះស្រាយ ទំនាស់និងសំណូមពរជូនប្រជាបលរដ្ឋនៅតាមមូលដ្ឋាន ដែលធ្វើឱ្យគូវិវាទត្រូវរូវគ្នា ព្រមទទួលយកដោយក្តីរីករាយ និង ឈ្នះឈ្នះទាំងអស់គ្នា ។
ឯកឧត្តម បានបញ្ជាក់ទៀតថា យន្តការដោះស្រាយទំនាស់និងសំណូមពរជូនប្រជាបលរដ្ឋនេះ មន្ត្រីអាជ្ញាធរមូលដ្ឋានទាំងអស់ត្រូវពង្រឹងការយកចិត្តទុកដាក់ អនុវត្តឱ្យបានកាន់តែល្អ ប្រសើរបន្ថែម ទៀត ដើម្បីឆ្លើយតបបានតាមសំណូមពរ និង តម្រូវការ របស់ប្រជាពលរដ្ឋ ក្នុងនាមជាអ្នកបម្រើប្រជាពលរដ្ឋ ។
គួរបញ្ជាក់ថា យុទ្ធនាការចុះដោះស្រាយទំនាស់ និងសំណូមពរជូនប្រជាពលរដ្ឋ នៅក្នុងខេត្តកំពង់ឆ្នាំង ចាប់ផ្តើមនៅថ្ងៃទី១ ខែវិច្ឆិកា ឆ្នាំ២០២១ ដោយមានលោក លោកស្រី ជាអភិបាលរងខេត្តមួយរូបដឹកនាំផ្ទាល់ សម្រាប់ចុះទៅតាមក្រុង ស្រុកទាំង៨របស់ខេត្តកំពង់ឆ្នាំង ។
