ភ្នំពេញ៖ អូប័រមួយគ្រឿងបានផ្ទុះម៉ាស៊ីនបណ្តាលឲ្យឆេះយ៉ាងសន្ធោរសន្ធៅ កាលពីវេលាម៉ោង៣រសៀលថ្ងៃទី៦ ខែមិនា ឆ្នាំ២០២១ នៅត្រង៉ចំណុចឆ្លងដរពីត្រើយម្ខាងទៅកោះពេជ្រ ក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ។ នៅក្នុងហេតុការណ៍នេះបណ្តាលឲ្យមនុស្ស៣នាក់គឺ ឪពុក ម្តាយ និងកូនរងរបួសធ្ងន់និងស្រាល ត្រូវបានគេបញ្ជូនទៅសង្គ្រោះនៅមន្ទីរពេទ្យ ។
ប្រភពព័ត៌មាននៅកន្លែងកើតហេតុ បានប្រាប់ឱ្យដឹងថា មុនពេលកើតហេតុគេបានឃើញ មនុស្សមួយក្រុម លក្ខណៈគ្រួសារ បានជិះរថយន្ត អូសអូប័រមួយគ្រឿង មកជិះលេងនៅកន្លែងឆ្លងដរ ពីត្រើយម្ខាងទៅទីក្រុងកោះពេជ្រ ខណៈពេលដាក់អូប័រ ទៅដល់លើទឹក ក៏បញ្ឆេះចោលប្រហែល៣០នាទី បន្ទាប់មកមានមនុស្ស៣នាក់ គឺឪពុក ម្តាយ និង កូនបានឡើងលើអូប័រ រួចដំឡើងម៉ាសុីនបម្រុងជិះទៅកណ្តាលទន្លេ ខណៈពេលកំពុងដំឡើងម៉ាសុីនក៏បានផ្ទុះបង្ករជាអណ្តាតភ្លើងឆាបឆេះយ៉ាងសន្ធោសន្ធៅតែម្តង ។
រីឯមនុស្សបានលោតទៅក្នុងទឹក បណ្តាលឲ្យកូនរងរបួសធ្ងន់ ឪពុកនិងម្តាយរងរបួសស្រាល ត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ ចំណែកអូប័រវិញត្រូវបានភ្លើងឆាបឆេះស្ទើតែទាំងស្រុង ៕
