អតីត​សិស្ស​ វិទ្យា​ល័យ​ព្រះ​បាទ​សុរា​ម្រឹត​ឆ្នាំ​សិក្សា​១៩៨៨​ រួម​គ្នា​សាង​សង់​កន្លែង​លាង​សំអាត​ដៃ​របស់​សិស្ស​

កំពង់ឆ្នាំង កន្លែងលាងសំអាតដៃនៅក្នុងវិទ្យាល័យព្រះបាទសុរាម្រឹត ដែលកសាងឡើងដោយអតីតសិស្សវិទ្យាល័យព្រះបាទសុរាម្រឹត ឆ្នាំសិក្សា១៩៨៨  ត្រូវបានប្រគល់ជូនដល់សាលាសម្រាប់ប្រើប្រាស់ប្រចាំថ្ងៃ ក្រោយពីបានសាងសង់រួចរាល់

ពិធីប្រគល់នេះគឺធ្វើឡើងកាលពីរសៀលថ្ងៃទី២៦ ខែមករា ឆ្នាំ២០២១ ក្រោមអធិបតីភាព លោកជំទាវឈឹម ស្រីមុំ ឈួរ ច័ន្ទឌឿនភរិយាឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង

លោកនាយកសាលាវិទ្យាល័យព្រះបាទសុរាម្រឹត បានឲ្យដឹងថា កន្លែងលាងសំអាតដៃនេះ គឺបានកសាងឡើងដោយមូលធិរបស់អតីតសិស្សវិទ្យាល័យព្រះបាទសុរាម្រឹត ជាសិស្សមធ្យមសិក្សាទុតិយភូមិឆ្នាំ១៩៨៨ ដែលបានផ្តួចផ្តើមឡើងដោយលោកជំទាវឈឹម ស្រីមុំ ឈួរ ច័ន្ទឌឿនភរិយាឯកឧត្តមឈួរ ច័ន្ទឌឿន អភិបាលខេត្តកំពង់ឆ្នាំង និងលោក កាំង លាង រស់នៅរាជធានីភ្នំពេញ ហើយការសាងសង់កន្លែងលាងសំអាតដៃនេះ បានចំណាយថវិការអស់ចំនួន១ ៧០០ដូល្លា

លោកជំទាវ ឈឹម ស្រីមុំ ឈួរច័ន្ទឌឿន ភរិយាឯកឧត្តមឈួរ ច័ន្ទឌឿន អភិបាលខេត្តកំពង់ឆ្នាំង បានមានប្រសាសន៍ថា ដើម្បីរួមចំណែកក្នុងការកសាងនិងអភិវឌ្ឍន៍សាលា អតីតសិស្សរួមជំនាន់បានធ្លាប់រៀនសូត្រនៅទីនេះ បានរួមគំនិតគ្នា កៀងគរនូវថវិកា រៀបចំសាងសង់កន្លែងលាងសំអាតដៃនេះឡើងដើម្បីឲ្យសិស្សានុសិស្សបានលាងសំអាតដៃជាប្រចាំ និង ដើម្បីចូលរួមអនុវត្តវិធានការអនាម័យតាមការណែនាំ របស់ក្រសួងសុខាភិបាល ក្នុងការទប់ស្កាត់ការីករាលដាលនៃជំងឺកូវីដ១៩

លោកជំទាវបានឲ្យដឹងទៀតថា ដើម្បីធានាបាននូវសុវត្ថិភាព និង អនុវត្តតាមកាណែនាំរបស់ក្រសួងអប់រំ ក៏ដូចជាក្រសួងសុខាភិបាល ទាល់តែនៅតាមសាលាមាន កន្លែងអនាម័យបានត្រឹមត្រូវ ដោយមើលឃើញអំពីសារៈសំខាន់នេះ សិស្សរួមជំនាន់ទាំងអស់បានរួមគំនិតគ្នាកសាងជូនដល់សាលាវិទ្យាល័យព្រះបាទសុរាម្រឹតតែម្តង នេះគឺជាសកម្មភាពមួយក្នុងការចូលរួមកិច្ចការសង្គមជាមួយរាជរដ្ឋាភិបាល ក្នុងកាទប់ស្កាត់ការរីករាលដាលនៃជំងឺកូវីដ១៩

នៅក្នុងឱកាសនៃការប្រគល់កន្លែងលាងសំអាតដៃនេះ អតីតសិស្សឆ្នាំ១៩៨៨ បានផ្តល់បន្ថែម ម៉ាស់ ជែលលាងដៃ  ម៉ាស៊ីនវាស់កំដៅនិង គ្រែពេទ្យចំនួន២ដល់នាយកសាលាសម្រាប់ប្រើប្រាស់នៅក្នុងសាលាផងដែរ

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង