កំពង់ឆ្នាំង ៖ កិច្ចប្រជុំបូកសរុបលទ្ធផលសកម្មភាពការងារ រយៈពេល៩ខែ ឆ្នាំ២០២០ របស់មន្ទីរព័ត៌មានខេត្តកំពង់ឆ្នាំង ត្រូវបានធ្វើឡើងនាព្រឹកថ្ងៃទី២០ ខែវិឆ្ឆិកា ឆ្នាំ២០២០ ក្រោមអធិបតីភាព ឯកឧត្តម ម៉ម ឈឿមទីប្រក្សាក្រសួងព័ត៌មាននិងជាប្រធានមន្ទីរព័ត៌មានខេត្តកំពង់ឆ្នាំង ។
មានប្រសាសន៍នៅក្នុងឱកាសនោះ ឯកឧត្តម ម៉ម ឈឿម បានសម្តែងនូវការកោតសរសើរនិងវាយតម្លៃខ្ពស់ ចំពោះថ្នាក់ដឹកនាំមន្រ្តី នៃការិយាល័យទាំង៥របស់មន្ទីរ ដែលក្នុងរយៈពេលកន្លងមកនេះ បានខិតខំប្រឹងប្រែងក្នុងការបំពេញការងារតាមជំនាញរបស់ខ្លួនយ៉ាងយកចិត្តទុកដាក់ និង ទទួលខុសត្រូវខ្ពស់ តាមការិយាល័យនីមួយៗ ។
ឯកឧត្តម ម៉ម ឈឿម ប្រធានមន្ទីរព័ត៌មានខេត្តកំពង់ឆ្នាំង បានឲ្យមន្រ្តីជំនាញទាំងអស់ បន្តយកចិត្តទុកដាក់បង្កើនប្រសិទ្ធភាពការងាររបស់ខ្លួនក្នុងវិស័យព័ត៌មានឲ្យបានកាន់តែប្រសើរជាងមុនបន្ថែមទៀត ត្រូវសហការ និងទំនាក់ទំនងគ្នាឲ្យបានល្អក្នុងការផលិតព័ត៌មានឲ្យបានច្រើន ។
នៅក្នុងកិច្ចប្រជុំនេះ ថ្នាក់ដឹកនាំមន្ទីរ និង ថ្នាក់ដឹកនាំការិយាល័យបានធ្វើការពិភាក្សាគ្នាលើចំណុចវិជ្ជមាន និងអវិជ្ជមាននៃសកម្មភាពការងារកន្លងមក និង បានដាក់នូវផែនការសកម្មភាពការងារមួយចំនួន ដែលត្រូវអនុវត្តបន្ត ដើម្បីធ្វើយ៉ាងណាឲ្យមានប្រសិទ្ធភាពលើការងារព័ត៌មាន គឺការិយាល័យទាំង៥របស់មន្ទីរត្រូវសហការគ្នាផលិតព័ត៌មាន ដើម្បីទាក់ទាញការទស្សនា ការស្តាប់ពីប្រជាពលរដ្ឋអោយបានច្រើនបំផុត ។
