អភិបាលខេត្តកំពង់ឆ្នាំង ជម្រុញអាជ្ញាធរមូលដ្ឋានទូទាំងខេត្ត ត្រូវបង្កើនប្រសិទ្ធភាពផ្តល់សេវាសាធារណៈ ជូនប្រជាពលរដ្ឋ

ឯក​ឧត្តម ឈួរ ច័ន្ទឌឿន អភិបាលខេត្ត​កំពង់ឆ្នាំង បាន​ជម្រុញ​អោយអាជ្ញាធរ​មូលដ្ឋាន​ទាំងអស់​នៅក្នុង​ខេត្ត ត្រូវ​បង្កើន​ប្រសិទ្ធភាព​ផ្តល់​សេវា​សា​ធារណៈនានា ជូនប្រជាពលរដ្ឋនៅតាមមូលដ្ឋានឱ្យកាន់តែល្អប្រសើរ ដើម្បីឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ។ ការជម្រុញ​នេះ​​បាន​ធ្វើឡើង​​នៅក្នុង​កិច្ចប្រជុំបូកសរុប​លទ្ធផល​ការងារប្រចាំឆមាសទី១ និងទិសដៅការងារ​ឆមាស​ទី២ ឆ្នាំ២០​២០ របស់រដ្ឋបាល​ខេត្ត​របស់​រដ្ឋបាល​ខេត្តកំពង់ឆ្នាំង កាល​ពីព្រឹកថ្ងៃទី២៧ ខែកក្កដា ឆ្នាំ២០២០នេះ។​

ជាមួយគ្នានោះ ឯកឧត្តម ក៏ជម្រុញបន្តយកចិត្តទុកដាក់ថែរក្សាសន្តិសុខសណ្តាប់ធ្នាប់សង្គម និងសុវត្ថិភាព​នៅក្នុង​ខេត្ត​ឲ្យ​បាន​ជាយន្តការ​សម្រា​ប់​​ការផ្តល់សេវា ប្រកបដោយប្រសិទ្ធភាព និងទាន់ពេលវេលាដើម្បី បម្រើឱ្យផលប្រយោជន៍ប្រជាពលរដ្ឋអ្នក ជំនួញសហគ្រិនជាដើម។ ជាមួយ​នេះក៏​ត្រូវចូលរូមលុបបំបាត់រាល់ភាពអសកម្មនានា​ នៅតាមរដ្ឋបាល​មូលដ្ឋាន ដោយប្រែក្លាយ​ពីអ្នកគ្រប់គ្រង​សេវា មកជា​អ្នកបម្រើ​សេវាសា​ធារ​ណៈ​ប្រកបដោយការទទួលខុសត្រូវខ្ពស់ ។

ឯកឧត្តម អភិបាលខេត្ត ក៏បានវាយ​តម្លៃខ្ពស់ ចំពោះថ្នាក់​ដឹកនាំ មន្រ្តីរាជការ កងកម្លាំងប្រដាប់​អាវុធក្នុង​ខេត្តកំពង់ឆ្នាំង ដែល​បានសហការ​​អនុវត្ត​តួនាទី ភារកិច្ចរបស់ខ្លួនក្នុងការផ្តល់សេវាសាធារណៈ ការរក្សាបាននូវសន្ដិសុខ សុវត្ថិភាពល្អប្រសើរជូនដល់ប្រជាពលរដ្ឋ នៅគ្រប់មូលដ្ឋាន ៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង