កំពង់ឆ្នាំង៖ កូនឈើប្រមាណជាង១ពាន់ដើម ត្រូវដាំនៅតំបន់ភ្នំនាងកង្រី ក្នុងស្រុកកំពង់លែង ខេត្តកំពង់ឆ្នាំង នៅថ្ងៃទី២៦ ខែកក្កដា ឆ្នាំ២០២០ ដោយមានការអញ្ជើញចូលរួមពីសំណាក់លោក សំចាន់ ថន អភិបាលស្រុកកំពង់លែង លោក ចេង ចាន់ដូណា អភិបាលរងស្រុកកំពង់លែង និងជាប្រធានសហភាពសហព័ន្ធយុវជនកម្ពុជា ស្រុកកំពង់លែង និងសមាជិកសមាជិកា សហភាពសហព័ន្ធយុវជនកម្ពុជាស្រុក កម្លាំងសមត្ថកិច្ច និងអាជ្ញាធរមូលដ្ឋានផងដែរ។
លោក សំចាន់ ថន អភិបាលស្រុកកំពង់លែង បានជម្រុញឲ្យសហគមន៏ និងយុវជនបន្តការដាំដុះនិងថែរក្សាការពារសុវត្ថិភាពឱ្យមានទ្រង់ទ្រាយធំ ដើម្បីបង្កើនបរិមាណដែលជាវិធានកាត់បន្ថយគ្រោះមហន្តរាយនានាជាយថាហេតុកើតឡើង ។ ហើយការចូលរួមដាំដើមឈើនេះគឺឆ្លុះបញ្ចាំងអំពីការចូលរួមការពារ គាំពារ អភិរក្ស និងលើកកម្ពស់បរិស្ថាន ក្រោមម្លប់សន្តិភាព និងការអភិវឌ្ឍន៍ ស្របតាមមាគា៍ដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។
ជាមួយគ្នានោះ លោកអភិបាលស្រុក ក៏បានធ្វើការណែនាំពីវិធានការការពារសុខភាព ក្នុងដំណាក់កាលនៃការរីករាលដាលនៃមេរោគកូវីដ១៩នៅកម្ពុជា ដោយអំពាវនាវដល់អ្នកចូលរួមទាំងអស់ ត្រូវឧស្សាហ៍ដុសលាងសម្អាតដៃជាមួយសាប៊ូ ជែលសម្លាប់មេរោគ ឬទឹកអាល់កុល ហើយប្រើប្រាស់ម៉ាសឲ្យបានជាប្រចាំ គ្រប់ទីកន្លែងទាំងអស់ និងត្រូវអនុវត្តតាមការណែនាំ របស់ក្រសួងសុខាភិបាលជាដើម។
គួរបញ្ជាក់ថា ការដាំដើមឈើនៅតំបន់ភ្នំនាងកង្រី ក្រោមប្រធានបទ “ដាំដើមឈើ សម្រាប់យុវជនជំនាន់ក្រោយ”នេះ ត្រូវបានសហភាពសហព័ន្ធយុវជន កម្ពុជាខេត្តកំពង់ឆ្នាំង រៀបចំឡើងជាផែនការយុទ្ធសាស្ត្រសម្រាប់ដាំរយៈពេល៥ឆ្នាំ (២០១៩-២០២៤) ដោយគម្រោងនេះ បានទទួលកិច្ចសហការគាំទ្រផ្តល់កូនឈើ ពីក្រសួងបរិស្ថាន សហគមន៍ក្នុងតំបន់ វិស័យឯកជន និងរដ្ឋបាលមូលដ្ឋាន។
សហភាពសហព័ន្ធយុវជនកម្ពុជាខេត្តកំពង់ឆ្នាំង ធ្លាប់បានអោយដឹងថា ការដាំដើមឈើ នេះ មានគោលដៅពង្រឹងសហគមន៍ អោយមានភាពប្រសើរឡើង យល់ដឹងកាន់តែ ស៊ីជម្រៅស្តីពី អត្ថប្រយោជន៍ នៃការអភិរក្ស ធនធានធម្មជាតិ និងចូលរួមគ្រប់គ្រង ប្រកបដោយ និរន្តរភាព តាមរយៈការអប់រំផ្សព្វផ្សាយ ការការពារ និងដាំដុះកូនឈើ ឡើងវិញលើផ្ទៃដីប្រមាណ ៥០ហិចតា ជុំវិញបរិវេណភ្នំនាងកង្រី៕ អត្ថបទ៖ សុគន្ធារី
