កំពង់ឆ្នាំង ៖ ដើម្បីជួយសម្រួលដល់ការលំបាក របស់នាយកវិទ្យាល័យតេជោហ៊ុនសែនទឹកហូត ស្រុករលាប្អៀរ ខេត្តកំពង់ឆ្នាំង នៅថ្ងៃទី១៦ ខែកក្កដា ឆ្នាំ២០២០នេះ លោកជំទាវ សឿ សុជាតា អនុរដ្ឋលេខាធិការក្រសួងអប់រំ យុវជននិងកីឡា រួមនិង ក្រុមការងារ បាននាំយកម៉ូតូមួយគ្រឿង រួមនិងអំណោយមួយចំនួនទៀត ប្រគល់ជូនលោក នូ សីហា ដែលកំពុងជួបបញ្ហាខ្វះខាតក្នុងជីវភាព ។
លោកជំទាវ សឿ សុជាតា អនុរដ្ឋលេខាធិការក្រសួងអប់រំយុវជន និង កីឡា បានបញ្ជាក់ថា អំណោយទាំងនេះ គឺ ជាការចូលរួមពីក្រុមការងារដោយរួបរួមគ្នា បរិច្ចាគនូវធនធានផ្ទាល់ខ្លួន បន្ទាប់ពីមើលឃើញនូវការលំបាកផ្នែកជីវភាពជាខ្លាំងរបស់លោកនាយកសាលា ពិសេសគឺមធ្យោបាយ ធ្វើដំណើរ សម្រាប់មកសាលារៀន ។
លោកជំទាវ បានកោតសរសើរនូវទឹកចិត្តអត់ធ្មត់របស់លោក នូ សីហា បើទោះបីជាលោកជួបការលំបាកផ្នែកជីវភាពយ៉ាងណាក៏ដោយ តែលោកនាយនៅតែខិតខំប្រឹងប្រែង តស៊ូគ្រប់ឧបសគ្គ ដោយមិនបោះបង់នូវភារកិច្ច ក្នុងការបំពេញកាតព្វកិច្ចរបស់ខ្លួនលើការដឹកនាំសាលាវិទ្យាល័យតេជោហ៊ុនសែនទឹកហូត ក្នុងឃុំទឹកហូត ស្រុករលាប្អៀរ ខេត្តកំពង់ឆ្នាំង អោយមានដំណើរការល្អប្រសើរ ប្រកបដោយការអភិវឌ្ឍន៍ ។
អំណោយដែលប្រគល់ជូននាពេលនេះ មានម៉ូតូហុងដា ១២៥ចំនួន១គ្រឿង អង្ករ៥០គីឡូក្រាម ទឹកសុទ្ធ មី១កេស នំធុង១ធុង និង ថវិកាមួយចំនួនផងដែរ ។
លោក នូ សីហា នាយកវិទ្យាល័យតេជោហ៊ុនសែនទឹកហូត ក្នុងឃុំទឹកហូត ស្រុករលាប្អៀរ ខេត្តកំពង់ឆ្នាំង បានសម្តែងអំណរគុណយ៉ាងជ្រាលជ្រៅ ចំពោះលោកជំទាវ សឿ សុជាតា អនុរដ្ឋលេខាធិការក្រសួងអប់រំយុវជននិងកីឡា រួមនិងក្រុមការងារទាំងអស់ ដែលបានយកចិត្តទុកដាក់ចំពោះរូបលោក ក្នុងការផ្តល់នូវអំណោយសប្បុរសដ៏មានតម្លៃនេះ ដែលនឹងជម្រុញអោយលោកខិតខំបំពេញភារកិច្ចរបស់ខ្លួនក្នុងការដឹកនាំ វិស័យអប់រំនៅវិទ្យាល័យតេជោហ៊ុនសែនទឹកហូត កាន់តែប្រសើរជាងមុនបន្ថែមទៀត ៕
