រដ្ឋបាល​ជល​ផល បញ្ជាក់​ពី​កាល​បរិច្ឆេទ​ រដូវបិទ​នេសាទ ​​ឆ្នាំ២០​២០

យោងតាមសេចក្ដីជូនដំណឹងរបស់ រដ្ឋបាលជលផល ស្ដីពី រដូវបិទនេសាទ ឆ្នាំ២០២០ ចេញផ្សាយនា​ពេលថ្មីៗ​នេះ​បានឲ្យ​ដឹង​ថា រដូវបិទនេសាទសម្រាប់ការនេសាទ នៅក្នុង ដែននេសាទ ទឹកសាប ត្រូវបានកំណត់-ចាប់ពីថ្ងៃទី១ ខែមិថុនា ដល់ថ្ងៃទី៣០ ខែកញ្ញា ចំពោះដែននេសាទទឹកសាបដែលស្ថិត នៅខាងជើងខ្សែស្របទន្លេចតុមុខ។

តំបន់ទាំងនោះ រួមមាន ៖ ខេត្ដទាំងអស់ជុំវិញបឹងទន្លេសាប និងបណ្ដា ខេត្តកំពង់ចាម ត្បូងឃ្មុំ ក្រចេះ រតនគិរី មណ្ឌលគិរី ព្រះវិហារ ប៉ៃលិន ឧត្តរមានជ័យ និងរាជធា នីភ្នំពេញ និង ខេត្តកណ្ដាល ផ្នែកខាងជើងចតុមុខ។ ចាប់ពីថ្ងៃទី១ ខែកក្កដា ដល់​ថ្ងៃទី៣១ ខែតុលា ឆ្នាំ២០២០ ចំពោះដែននេសាទទឹកសាប ដែល ស្ថិតនៅខាងត្បូងខ្សែស្រប ទន្លេចតុមុខ ដែលរួមមាន ៖ រាជធានីភ្នំពេញ ផ្នែកខាងត្បូងចតុមុខ ខេត្តកណ្ដាល ព្រៃវែង តាកែវ កំពង់ស្ពឺ និងខេត្តស្វាយរៀង។

បើតាមរដ្ឋបាលជលផល នៅក្នុងរយៈពេលបិទនេសាទនេះ អ្នកនេសាទទាំងអស់ត្រូវប្រើប្រាស់ តែឧបករណ៍ នេសាទគ្រួសារ ដែលមានចែងក្នុងប្រកាស លេខខ៤៥៨ ប្រក.កសក។ ចំពោះ ឧបករណ៍ដូចជា អួន ម៉ាញ់ ចៃរ៉ា ជន សាប នាម ឈ្នក់ មិន​អនុញ្ញាត​ឲ្យ​ប្រើ​ឡើយ ក្នុងរដូវបិទនេសាទនេះ ដោយឡែក ឧបករណ៍ មងអាច ធ្វើនេសាទបានតែប្រវែង ១០០ម៉ែត្រ ប៉ុណ្ណោះ។

ក្នុងនោះដែរ ពលរដ្ឋត្រូវចូលរួមជួយការពារកន្លែងអភិរក្សជលផលឲ្យបានគង់វង្សដើម្បីទុក រក្សាពូជត្រីតាមអនុសាសន៍របស់​ប្រមុខ​រាជ​រដ្ឋាភិបាល សម្តេចតេជោ ហ៊ុន សែន៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង