ហាងថតរូបមួយកន្លែងនៅក្នុងខេត្តកំពង់ឆ្នាំង ដែលមានឈ្មោះ មិត្តភាព (Mittapheap Photography & Video) បានប្រកាសមិនកាត់លុយកក់នោះឡើយ ប្រសិនបើម្ចាស់មង្គលការ រឺពិធីផ្សេងៗ សម្រេចពន្យាពេលឬរំសាយកម្មវិធីនោះដោយសារបញ្ហាកូវីដ-១៩។
តាមរយះការជូនដំណឹងដល់អតិថិជននៅលើគណនីហ្វេកបុក Khou Lyka បានបញ្ជាក់ថា ”ក្នុងពេលដែលស្ថានភាពនៃជម្ងឺ ឆ្លងកូវីដ-១៩ (Covid-19) កំពុងមានការរីករាលដាលនៅពាសពេញប្រទេសក្នុងពិភពលោកពីមួយថ្ងៃទៅមួយថ្ងៃ ហាងថតរូបមិត្តភាព (Mittapheap Photography & Video) យើងខ្ញុំមានកិត្តិយសសូមជម្រាបជូនដំណឹងៗអោយបានជ្រាបថា : គ្រប់អតិថិជនដែលបានជ្រើសរើសយកសេវាកម្មថតរូប និងវីដេអូក្នុងពិធីមង្គលការ រឺពិធីផ្សេងៗ ពីហាង យើងខ្ញុំ និងបានធ្វើការកក់លុយរួចហើយ ហើយមានបំណងធ្វើការពន្យាពេល រឺរំសាយកម្មវិធីនោះចោលវិញដោយហេតុតែមាន ការភ័យខ្លាចនិងជម្ងឺកូវីដ-១៩ ដូច្នេះសូមអតិថិជនមកធ្វើការទទួលនូវលុយដែលបានកក់នោះទៅវិញដោយហាងយើងខ្ញុំពុំមានកាត់លុយកក់នោះឡើយ”។
គួរបញ្ជាក់ថា កម្ពុជាបានដាក់ចេញវិធានការជាបន្តបន្ទាប់ដើម្បីឆ្លើយតបការរីករាលដាលមេរោគCOVID19។ ជាមួយគ្ននោះក្រសួងជាច្រើនបានប្រកាសលើកពេលរៀបចំសន្និបាតប្រចាំឆ្នាំ ហើយពិធីសម្ពោធសមិទ្ធផលសាធារណៈ កម្មវិធីសាសនា កម្មវិធីមង្គលការ និងឡើងគេហដ្ឋានជាដើម ក៏ត្រូវបានភាគីសាមី ឬម្ចាស់កម្មវិធី សម្រេចផ្អាកជាបន្តបន្ទាប់ដែរ ដើម្បីចូលរួមទប់ស្កាត់ការរីករាលដាលវីរុសCOVID19។ ជាការកត់សំគាល់កម្មវីធីមង្គលការ និងឡើងគេហដ្ឋានដែលបានប្រារព្ធនាប៉ុន្មានថ្ងៃចុងក្រោយនេះ មានសភាពស្ងប់ស្ងាត់ មិនសូវមានភ្ញៀវចូលរួមនោះឡើយ៕
