ការ​ប្រកួត​កីឡា​សិស្ស​ជ្រើស​រើស​ជើង​ឯក​ថ្នាក់​ខេត្ត ​នៅ​ក្នុង​ខេត្ត​កំពង់​ឆ្នាំង​ ត្រូវ​បាន​បិទ​បញ្ចប់​ហើយ​

កំពង់ឆ្នាំង ៖ ការប្រួតកីឡាសិស្សបឋមសិក្សា និងមធ្យមសិក្សាជ្រើសរើសជើងឯកថ្នាក់ខេត្ត ប្រចាំឆ្នាំ២០២៣ -២០២៤ ត្រូវបានបិទបញ្ចប់ហើយ ក្រោយពីបានដំណើរការប្រកួត អស់រយះពេលមួយសប្តាហ៍កន្លងទៅ ។

ពិធីបិទការប្រកួតនេះធ្វើឡើង នៅព្រឹកថ្ងៃទី២១ ខែកុម្ភៈ ឆ្នាំ២០២៤ ក្រោមអធិបតីភាព លោក ឈឹម វុទ្ធា អភិបាលរង ខេត្តកំពង់ឆ្នាំង ។លោក ម៉ូវ តឿ អនុប្រធានមន្ទីរអប់រំ យុវជន និងកីឡា ខេត្តកំពង់ឆ្នាំង បានឲ្យដឹងថា ការប្រកួតឆ្នាំនេះ មានប្រតិភូគ្រូបង្វឹក និងកីឡាករ កីឡាកាតនី ចូលរួមសរុបចំនួន ១.៨០០នាក់ ស្រីចំនួន៨១៧នាក់។ ដោយចាប់ផ្តើមដំណើរការប្រកួតពីថ្ងៃទី១៥ដល់ថ្ងៃទី២១ កុម្ភ:។ ការប្រកួតបានប្រព្រឹតទៅដោយរលូន និងសម្រេចបានជោគជ័យជាស្ថាពរ ដោយកីឡាករមានឥរិយាបថថ្លៃថ្នូរ ប្រឹងប្រែងអស់ពីសមត្ថភាព ប្រកបដោយមិត្តភាព សាមគ្គីភាព និង សប្បាយរីករាយក្នុងការប្រកួតកីឡាគ្រប់ប្រភេទ។

លោក អនុប្រធានមន្ទីរបានឲ្យដឹងថា ចំពោះវិញ្ញាសារ ដែលត្រូវប្រកួតមានដូចជា បាល់ទាត់ បាល់ទះ បាល់បោះ អត្តពលកម្ម ប៉េតង់ វាយសី វាយកូនឃ្លីលើតុ និងល្បុក្កតោ ។

លោក ឈឹម វុទ្ធា អភិបាលរងខេត្តកំពង់ឆ្នាំង បានថ្លែងអំពាវនាវដល់គ្រប់អ្នកពាក់ព័ន្ធបន្តជួយគាំទ្រដល់វិស័យកីឡា ដើម្បីឲ្យយុវជនងាកមកលេងកីឡា ចៀសវាងទៅប្រព្រឹត្តនូវអំពើអបាយមុខផ្សេងៗ។

លោក អភិបាលរងខេត្តបានថ្លែងបន្តថា ការអប់រំកាយ និងកីឡា ជាសកម្មភាពមិនអាចខ្វះបាន នៅក្នុងកិច្ចអភិវឌ្ឍន៍សង្គមសេដ្ឋកិច្ច ធនធានមនុស្ស បំបាត់អំពើហឹង្សា និងទប់ស្តាត់ការប្រើប្រាស់គ្រឿងញៀន ៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង