អភិបាល​ខេត្តកំពង់ឆ្នាំង គ្រោង​នឹងបង្កើតភូមិទេ​សចរណ៍​នៅ​ស្រុកទឹកផុស

កំពង់ឆ្នាំង ៖ អភិបាលខេត្តកំពង់ឆ្នាំង ឯកឧត្តម ស៊ុន សុវណ្ណារិទ្ធិ បានបញ្ជាក់ថា អាជ្ញាធរខេត្ត​មានគម្រោងបង្កើតភូមិទេសចរណ៍ និងរៀបចំអភិវឌ្ឍន៍តំបន់ទេសចរណ៍ នៅក្នុងស្រុកទឹកផុស ឲ្យកាន់តែមានភាពទាក់ទាញ  ដើម្បីបម្រើដល់វិស័យទេសចរណ៍របស់ខេត្ត។

ឯកឧត្តម បានថ្លែងបង្ហើបពីគម្រោងបង្កើតភូមិទេសចរណ៍នេះ បានធ្វើឡើងនៅក្នុងពិធីបើក​ការដ្ឋានស្ថាបនាផ្លូវក្រាលកៅស៊ូប្រវែងជិត៤គីឡូម៉ែត្រនៅភូមិទ្រាជើង ឃុំស្រែថ្មី ស្រុក​រលាប្អៀរ នាព្រឹកថ្ងៃទី៣ ខែកុម្ភៈ ឆ្នាំ២០២៣ ។

ឯកឧត្តម ស៊ុន សុវណ្ណារិទ្ធិ បានឲ្យដឹងថា នៅក្នុងស្រុកទឹកផុស មានតំបន់ទេសចរណ៍ធម្មជាតិជាច្រើន​កន្លែងដូចជា តំបន់ទេសចរណ៍ទឹកធ្លាក់ថ្មក្រាល ស្ថិតនៅក្នុងភូមិកោះក្ទម្ព ឃុំជៀប តំបន់ទេសចរណ៍ទឹកធ្លាក់អន្លង់ស្វាយ ស្ថិតនៅក្នុងភូមិដូងស្លា ឃុំក្បាលទឹក និងតំបន់ទេសចរណ៍ ទឹកធ្លាក់ស្រែអំពិល ស្ថិតនៅក្នុងភូមិស្រែអំពិល ឃុំក្តុលសែនជ័យ ។ តំបន់ទេសចរណ៍ទាំង៣​តាំងនេះ បានក្លាយជាគោលដៅទេសចរណ៍ដ៏សំខាន់ដែលបានទាក់ទាញភ្ញៀវ​ទេសចរ​ណ៍​​​​ឲ្យមកលេងកម្សាន្ត ខេត្តកំពង់ឆ្នាំង។ជាមួយគ្នានេះ ឯកឧត្តម អភិបាលខេត្តកំពង់ឆ្នាំង បានបញ្ជាក់ទៀតថា ដើម្បីជាការទាក់ទាញ​ភ្ញៀវទេសចរណ៍ ឲ្យមកលេងកំសាន្តកាន់តែច្រើន​ថែមទៀត រដ្ឋបាលខេត្ត ក៏មានគម្រោង​ស្ថាបនាផ្លូវក្រាលកៅស៊ូឆ្ពោះទៅកាន់តំបន់ទេសចរណ៍ទាំងនេះផងដែរ ។

គួរបញ្ជាក់ថា ខេត្តកំពង់ឆ្នាំង មានតំបន់សក្តានុពលទេសចរណ៍ចំនួន២៤កន្លែង ក្នុងនោះ​រមណី​​យ​​​ដ្ឋានទេសចរណ៍ធម្មជាតិមាន១៤កន្លែង និងរមណីយ​​​ដ្ឋានទេសចរណ៍វប្បធម៌​ប្រវត្តិសា​ស្ត្រ​មាន១០កន្លែង៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង