កំពង់ឆ្នាំង ៖ ផ្លូវក្រាលកៅស៊ូ២ជាន់ ប្រភេទ DBST ប្រវែងជាង១១គីឡូម៉ែត្រ ចេញពីស្រុករលាប្អៀរ ឆ្ពោះទៅកាន់ស្រុកកំពង់ត្រឡាច ខេត្តកំពង់ឆ្នាំង ត្រូវបានបើកការដ្ឋានស្ថាបនា នៅថ្ងៃទី២៥ ខែសីហា ឆ្នាំ២០២២ ក្រោមអធិបតីភាព ឯកឧត្តម បណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ ។
ឯកឧត្តម ជ្រាយ ប៉ុម អគ្គនាយកបច្ចេកទេស នៃក្រសួងអភិវឌ្ឍន៍ជនបទ បានឲ្យដឹងថា ផ្លូវដែលបានបើកការដ្ឋានស្ថាបនានេះ មានប្រវែង១១០៨៤ ម៉ែត្រ ទទឹង៧ម៉ែត្រ ជាប្រភេទផ្លូវក្រាលកៅស៊ូ២ជាន់ DBST ។ ផ្លូវនេះចេញពីភូមិទឹកចេញ ឃុំជើងគ្រាវ ស្រុករលាប្អៀរ ឆ្ពោះទៅកាន់ភូមិស្រែសារ ឃុំឈូកស ស្រុកកំពង់ត្រឡាចខេត្តកំពង់ឆ្នាំង ។
នៅលើប្រវែងផ្លូវនេះ មានដាក់លូប្រអប់ចំនួន៣កន្លែង លូមូលកាត់ទទឹងផ្លូវចំនួន២៧កន្លែង លូមូលកាត់ផ្លូវបំបែកចំនួន២៧កន្លែង បំពាក់ស្លាកនិងសញ្ញាចរាចរណ៍៧៨កន្លែង ដែលគ្រោងស្ថាបនារយះពេល១២ខែ អស់ទឹកប្រាក់ប្រមាណ ១ ៥៥១ ០៦៣ ,២៨ ដូល្លាអាមេរិច ។
ឯកឧត្តម បណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានថ្លែងថា ហេដ្ឋារចនាសម្ព័ន្ធ និង ផ្លូវគមនាគមន៍ជនបទ ជាសសៃឈាមសេដ្ឋកិច្ចដ៏សំខាន់ សម្រាប់ភ្ជាប់សកម្មភាពធុរកិច្ចផ្សេងៗក្នុងតំបន់ ជម្រុញកំណើនប្រាក់ចំណូល របស់ប្រជាជននៅជនបទ និង ធ្វើឲ្យតម្លៃអចលនទ្រព្យ មានការកើនឡើងផងដែរ ៕
