កំពង់ឆ្នាំង ៖ អភិបាលខេត្តកំពង់ឆ្នាំង ឯកឧត្តម ស៊ុន សុវណ្ណារិទ្ធិ បានក្រើនរំលឹកដល់មន្រ្តីអាជ្ញាធរមូលដ្ឋានគ្រប់លំដាប់ថ្នាក់និងមន្ត្រីជំនាញពាក់ព័ន្ធ ត្រូវសហការគ្នាឲ្យបានល្អ ទប់ស្កាត់ការកាប់រុករាន ទន្ទ្រាន ឈូសឆាយដីព្រៃរបស់រដ្ឋយកធ្វើជាកម្មសិទ្ធិ ដោយខុសច្បាប់ឲ្យមានប្រសិទ្ធិភាព ។
ឯកឧត្តម ស៊ុន សុវណ្ណារិទ្ធិ បានធ្វើការក្រើនរំលឹកដល់មន្ត្រីក្រោមឱវាទបែបនេះ នៅក្នុងកិច្ចប្រជុំសាមញ្ញលើកទី៣០ អាណត្តិទី៣ របស់ក្រុមប្រឹក្សាខេត្តកំពង់ឆ្នាំង នាព្រឹកថ្ងៃទី៧ ខែធ្នូ ឆ្នាំ២០២១នេះ ។
ឯកឧត្តមអភិបាលខេត្តកំពង់ឆ្នាំង បានបញ្ជាក់ថា ផ្ទៃដីព្រៃលិចទឹកស្ថិតក្នុងតំបន់៣ ជាង២ពាន់ហិកតាត្រូវជនខិលខូច លួចកាប់ទន្ទ្រានយកធ្វើជាកម្មសិទ្ធិដោយមិនស្របច្បាប់ ។ ក្រោយពីបានដកហូតមករក្សាទុកជាសម្បត្តិរបស់រដ្ឋវិញ កាលពីពេលថ្មីៗនេះអាជ្ញាធរខេត្ត បានសហការជាមួយក្រសួងកសិកម្មរុក្ខាប្រម៉ាញ់និងនេសាទ ដាំកូនឈើព្រៃលិចទឹកឡើងវិញ នៅលើដីដែលបានដកហូតនោះផងដែរ។
ឯកឧត្តម ស៊ុន សុវណ្ណារិទ្ធិ បានសង្កត់ធ្ងន់ថា មន្ត្រីជំនាញដែលពាក់និងមន្ត្រីអាធរមូលដ្ឋានគ្រប់លំដាប់ថ្នាក់ ត្រូវសហការគ្នា ការពារឲ្យបានមត់ចត់បំផុត បើមានសកម្មភាពល្មើសជាបន្តទៀតត្រូវចាត់វិធានការតាមផ្លូវច្បាប់ ដោយមិនមានការលើកលែងនោះឡើយ ៕
