អាជ្ញាធរស្រុកកំពង់លែង សម្រេចផ្អាកសកម្មភាពលក់ដូរជាបណ្តោះអាសន្ន ចំពោះភោជនីយដ្ឋាន អាហារដ្ឋាន តូបលក់បាយម្ហូបទាំងអស់ និងលក់ដូរគ្រឿងស្រវឹង នៅក្នុងភូមិសាស្ត្រស្រុកកំពង់លែង ចាប់ពីថ្ងៃទី១៣ ខែកញ្ញា តទៅរហូតដល់មានការជូនដំណឹងជាថ្មី។
ការសម្រេចផ្អាកសកម្មភាពលក់ដូរម្ហូបអាហារ និងគ្រឿងស្រវឹង ទូទាំងស្រុកកំពង់លែង នាពេលនេះ គឺដើម្បីបន្តចូលរួម ទប់ស្កាត់ការឆ្លងរាលដាលនៃជម្ងឺកូវីដ-១៩ ឱ្យកាន់តែមានប្រសិទ្ធភាពថែមទៀត ក្រោយរកឃើញអ្នកឆ្លងជំងឺកូវីដ-១៩ បំប្លែងថ្មី ប្រភេទដែលតាចំនួន១៨នាក់ នៅឃុំសំរោងសែន ។
ជាមួយគ្នានេះ អាជ្ញាធរស្រុកកំពង់លែង ក៏ហាមឃាត់ជាបណ្តោះអាសន្ន ចំពោះពិធីជួបជុំគ្រប់ប្រភេទការជប់លៀង ផឹកស៊ី រៀបចំកម្មវិធីសែនព្រេងកូនចៅ និងពិធីបុណ្យផ្សេងៗ លើកលែងតែពិធីបុណ្យសព ប៉ុណ្ណោះ។
អាជ្ញាធរស្រុក ក៏ណែនាំដល់ថ្នាក់ដឹកនាំ ឃុំ ភូមិ និងសមត្ថកិច្ច ត្រូវបន្តផ្សព្វផ្សាយជំរុញឱ្យប្រជាពលរដ្ឋទូទៅនៅមូលដ្ឋានគ្រប់ៗ ក្រុមគ្រួសារព្រមទាំងគ្រប់ទីកន្លែង ជាពិសេសទីផ្សារ ទីប្រជុំជន ត្រូវអនុវត្តវិធានការ៣ការពារ និង៣កុំ” ឱ្យបានម៉ត់ចត់៕
