កំពង់ឆ្នាំង ៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង រួមដំណើរដោយឯកឧត្តមឡុង ឈុនឡៃ ប្រធានក្រុមប្រឹក្សាខេត្ត និងលោកជំទាវ កែ ច័ន្ទមុន្នី អ្នកតំណាងរាស្រ្តមណ្ឌលកំពង់ឆ្នាំង នៅព្រឹកថ្ងៃទី១២ ខែសីហា ឆ្នាំ២០២១នេះ បានអញ្ជើញចុះសាកសួរសុខទុក្ខនិងនាំយកអំណោយ របស់រដ្ឋបាលខេត្តកំពង់ឆ្នាំងទៅប្រគល់ជូនរដ្ឋបាលស្រុកទឹកផុស សម្រាប់ចែកជូនដល់ប្រជាពលរដ្ឋ ដែលកំពុងសម្រាកព្យាបាលជំងឺកូវីដ១៩ នៅមណ្ឌលព្យាបាលកម្រិតស្រាល ក្នុងស្រុកទឹកផុស ខេត្តកំពង់ឆ្នាំង ។
នៅក្នុងឱកាសនោះ ឯកឧត្តម ស៊ុន សុវណ្ណារិទ្ធិ អភិបាលខេត្ត ឯកឧត្តមឡុង ឈុន ឡៃ ប្រធានក្រុមប្រឹក្សាខេត្ត និង លោកជំទាវកែ ច័ន្ទមុន្នី តំណាងរាស្ត្រមណ្ឌលកំពង់ឆ្នាំង បានថ្លែងនូវការកោតសរសើរចំពោះអាជ្ញាធរស្រុក ក្រុមគ្រូពេទ្យនិងមន្ត្រីពាក់ព័ន្ធទាំងអស់ ដែលបានយកចិត្តទុកដាក់សហការគ្នាបានយ៉ាងល្អ ក្នុងការទប់ស្កាត់ការរីករាលដាល នៃជំងឺកូវីដ.១៩។
ឯកឧត្តម ស៊ុន សុវណ្ណារិទ្ធិ ឯកឧត្តមឡុង ឈុនឡៃ និង លោកជំទាវ កែ ច័ន្ទមុន្នី ក៏បានផ្តាំផ្ញើដល់មន្ត្រីអាជ្ញាធរគ្រប់លំដាប់ថ្នាក់ ត្រូវបន្តយកចិត្តទុកដាក់បន្ថែមទៀត ក្នុងសកម្មភាពប្រយុទ្ធនិងទប់ស្កាត់ការឆ្លងរាលដាល នៃជំងឺកូវីដ១៩ តាមរយៈការចុះអប់រំផ្សព្វផ្សាយ និង ជម្រុញការអនុវត្តវិធានការរបសរាជរដ្ឋាភិបាល «៣កុំ និង៣ការពារ» ប្រកបដោយប្រសិទ្ធ ភាពខ្ពស់ ធ្វើយ៉ាងណាឱ្យប្រជាពលរដ្ឋបានរួចផុតពីជំងឺដ៏កាចសាហាវនេះ ។
អំណោយទាំងនោះរួមមាន អង្ករចំនួន១តោន មីចំនួន១០កេស ត្រីខ៣កេស ភេសជ្ជៈ៣០កេស អាកុល៦០លីត្រ និង ម៉ាសចំនួន២ កេស ស្មើនឹង៥០០០ ម៉ាស. ៕
