កំពង់ឆ្នាំង ៖ ក្រោយពីអាជ្ញាធរសម្រេចបើកឲ្យដំណើរការឡើងវិញ ចំពោះរមណីយដ្ឋានធម្មជាតិនានា ក្នុងខេត្តកំពង់ឆ្នាំង គេសង្កេតឃើញមានភ្ញៀវទេសចរជាច្រើន ទាំងក្នុងខេត្តនិងមកពីក្រៅខេត្តបាននាំគ្នាមកលេង ក្នុងនោះរមណីយដ្ឋានធម្មជាតិទឹកធ្លាក់ថ្មក្រាល ស្ថិតក្នុងឃុំជៀប ស្រុកទឹកផុស មានភ្ញៀវទេសចរមកលេងច្រើនជាងគេ ។
លោកសេង សាលី ប្រធានមន្ទីរទេសចរណ៍ ខេត្តកំពង់ឆ្នាំង បានឲ្យដឹងថា ក្រោយពីបើកឲ្យដំណើរការឡើងវិញ ចំពោះរមណីយដ្ឋានធម្មជាតិ នៅក្នុងខេត្តកំពង់ឆ្នាំង មានភ្ញៀវទេសចរ មកលេងច្រើនមានទាំងភ្ញៀវក្នុងខេត្ត និង មកពីក្រៅខេត្ត ប៉ុន្តែសម្រាប់ភ្ញៀវបរទេសមិនមាននោះទេ ។
លោកប្រធានមន្ទីរបានឲ្យដឹងថា ក្រោយពីបើកឲ្យដំណើរការឡើងវិញ នៅថ្ងៃឈប់សម្រាកចុងសប្តាហ៍កន្លងទៅនេះ មានភ្ញៀវទេសមកលេងនៅតាមរមណីដ្ឋាននានាក្នុងខេត្តកំពង់ឆ្នាំង ចំនួន១៣ ៥០៤នាក់ ។ ក្នុងនោះរមណីយដ្ឋានធម្មជាតិទឹកធ្លាក់ថ្មក្រាល មានភ្ញៀវទេសចរ មកលេងច្រើនជាងគេ ។
លោកសេង សាលី ប្រធានមន្ទីរទេសចរណ៍ខេត្តកំពង់ឆ្នាំង បានឲ្យដឹងថា នៅតាមតំបន់ទេសចរណ៍និមួយៗ រៀបចំបានត្រឹមត្រូវតាមការណែនាំរបស់ក្រសួងទេសចរណ៍ និង ក្រសួងសុខាភិបាល។ លោកប្រធានមន្ទីរក៏បានអំពាវនាវផងដែរ ដល់ភ្ញៀវទេសចរណ៍ ដែលមកលេងកំសាន្តនៅតាមតំបន់ទេសចរណ៍នានាក្នុងខេត្តកំពង់ឆ្នាំង ត្រូវចូលរួមអនុវត្តឲ្យបានត្រឹមត្រូវតាមការណែនាំរបស់ក្រសួងសុខាភិបាល ជាពិេសសគឺ៣កុំនិង៣ការពារ ឲ្យបានខ្ជាប់ខ្ជួន ៕
