យុវជននិងប្រជាពលរដ្ឋជាង២០០នាក់ ប្រមូលផ្តុំគ្នាគោរពវិញ្ញាក្ខន្ធអ្នកស្លាប់ ក្នុងរបបខ្មែរក្រហមនៅមជ្ឈមណ្ឌលប្រល័យពូជសាសន៍ជើងឯក

មុន​មួយ​ថ្ងៃ​នៃ​ទិវា​រំលឹក​ខួប​លើក​ទី៤១ នៃទិ​វា​ជ័យ​ជម្នះ​៧ មករា ដែល​ជា​ថ្ងៃ​ដែល​ប្រទេស​កម្ពុជា​ត្រូវ​បាន​រំដោះ​រួច​ផុត​ពី​របប​ខ្មែរ​ក្រហម​នោះនៅ ព្រឹក​ថ្ងៃទី០​៦ ខែមករានេះ សមា​ជិក សមា​ជិកា ថ្នាក់​ដឹក​នាំ សហ​ភាព​សហ​ព័ន្ធយុវជន​កម្ពុជា និង​ប្រជា​ព​លរដ្ឋប្រមាណ​ជាង​ ២០០នាក់ បាន​មក ប្រមូល​ផ្តុំគ្នា ធ្វើ​ពិធី​គោរព​វិញ្ញាក្ខន្ធ ឧទ្ទិស​កុសល ជូន​ជន​រងគ្រោះ និង​អតីត​យុទ្ធជន យុទ្ធនារី ដែល​បាន​បាត់បង់​​ជីវិត ក្នុង​របប​ប្រល័យ​ពូជសា​ស​ន៍​ខ្មែរ​ក្រ​ហម នៅ​មជ្ឈ​មណ្ឌល​ប្រល័យ​ពូជសាសន៍​ជើងឯក ស្ថិត​នៅ​ក្នុង ខណ្ឌ​ដង្កោ រាជធានី​ភ្នំពេញ។

តាមការ​ជូន​ដំណឹង​របស់​សហភាព​​សហព័ន្ធ​យុវជន​​​កម្ពុជា បាន​បញ្ជាក់​ថា ការ​រៀបចំ​ពិធី​គោរព​វិញ្ញាក្ខន្ធ ឧទ្ទិស​កុសល ជូន​ជន​រង​គ្រោះ និង​អតីត យុទ្ធជន យុទ្ធនារី ដែល​បាន​បាត់​បង់ ជីវិត​ក្នុង​របប​ប្រល័យ​ពូជ​សាសន៍ខ្មែរក្រហម​នេះ មាន​គោល​ដៅដើម្បីជា​ការ​ចង​ចាំ ក៏​ដូច​ជា​រំឭក ដល់​តម្លៃ ជីវិត ​និង​ការ​រស់​រាន​មាន ជីវិត​របស់​ប្រជាពលរដ្ឋកម្ពុជា​សារ​ជាថ្មី។

តាម​ឯកសារ​ជន​រង​គ្រោះ​ដែល​ត្រូវ​បាន​គេ​យក​មក​សម្លាប់​នៅ​វាល​ពិឃាដ​ជើង​ឯក មាន​ចំនួន​ប្រមាណ​ជិត​ពីរ​ម៉ឺន​នាក់ ក្នុង​នោះ​រួម​មាន​កសិករ មន្រ្តី ​ទាហាន ​បញ្ញវន្ត​ អង្គ​ទូត ជន​បរទេស ជាពិសេស​កុមារ និងស្ត្រីជាដើម។ ជា​រៀង​រាល់​ឆ្នាំ អាជ្ញា​ធរ មន្ត្រី​រាជការ ប្រជា​ពល​រដ្ឋ តែង​តែ​ទៅ​ប្រារព្ធ​ពិធី​បង្សុកូល​រំលឹក​វិញ្ញាណក្ខន្ធ ជូន​ដល់​អ្នក​ដែល​ស្លាប់​ក្នុង​សម័យ​របបកម្ពុជា​ប្រជាធិប​តេយ្យ ប៉ុល ពត៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង