ដំណាំម្ទេសប្លោក និងដំណាំពោត របស់កសិករ នៅឃុំកំពង់អុស ស្រុកជលគិរី ខេត្តកំពង់ឆ្នាំង កំពុងដុះលូតលាស់ល្អ គ្មានជម្ងឺ និងសត្វល្អិតចង្រៃបំផ្លាញនោះឡើយ។ នេះបើតាមការអោយដឹងពី ការិយាល័យក្សេត្រសាស្រ្តនិងផលិតភាពកសិកម្ម នៃមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង។
បើតាមការិយាល័យក្សេត្រសាស្រ្តនិងផលិតភាពកសិកម្ម ដដែល បានអោយដឹងទៀតថា ក្នុងដំណើរចុះពិនិត្យការដាំដុះដំណាំបន្លែរបស់កសិករនៅតំបន់ត្រសេកជ្រុំ ក្នុងឃុំកំពង់អុស ស្រុកជលគិរី កាលថ្ងៃទី១០ ខែមិថុនា ឆ្នាំ២០២០ ក្រៅពីដំណាំម្ទេសប្លោក និងដំណាំពោត ក៏នៅមានដំណាំត្រសក់ ត្រឡាច ត្រប់វែង និងត្រប់ស្រួយ ក៏កំពុងដុះលូតលាស់ល្អ គ្មានជម្ងឺ និងសត្វល្អិតចង្រៃបំផ្លាញ ដូចគ្នា។
គួរបញ្ជាក់ថា បន្ថែមលើការពិនិត្យការដាំដុះដំណាំបន្លែរបស់កសិករនៅតំបន់ត្រសេកជ្រុំ ក្នុងឃុំកំពង់អុស ស្រុកជលគិរី មន្ត្រីរបស់ការិយាល័យក្សេត្រសាស្រ្តនិងផលិតភាពកសិកម្ម រួមជាមួយការិយាល័យផែនការគណនេយ្យ ក៏បានចុះពិនិត្យដំណាំដំឡូងជ្វារបស់កសិករ នៅតំបន់ព្រែកបូពាំង ក្នុងសង្កាត់ផ្សារឆ្នាំង ក្រុងកំពង់ឆ្នាំង ផងដែរ៕
