កំពង់ឆ្នាំង ៖ មនុស្សម្នាក់បានស្លាប់ភ្លាមៗនៅនឹងកន្លែងកើតហេតុ ក្នុងករណីគ្រោះថ្នាក់ចរាចរណ៍មួយដែលបង្កឡើងដោយ រថយន្ត ខណៈរងគ្រោះកំពុងដើរឆ្លងផ្លូវ ។ ហេតុការណ៍នេះបានកើតឡើងកាលពីម៉ោង១៥និង៣០នាទីថ្ងៃទី១ ខែមិថុនា ឆ្នាំ២០២០នៅលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ៥៥និង៥៦ ស្ថិតក្នុងភូមិច្រករមៀត ឃុំអូឬស្សី ស្រុកកំពង់ត្រឡាច ខេត្តកំពង់ឆ្នាំង ។
មន្ត្រីនគរបាលចរាចរណ៍ បានអោយដឹងថា ជនរងគ្រោះមានឈ្មោះឈឿន សុគុណ ភេទប្រុស អាយុ៤០ឆ្នាំ រស់នៅភូមិព្រែកត្រែង ឃុំសិត្បូ ស្រុកស្អាង ខេត្តកណ្ដាល ។
មន្ត្រីនគរបាលខាងលើបានអោយដឹងទៀតថា នៅមុនពេលកើតហេតុ ជនរងគ្រោះបានដើរឆ្លងផ្លូវ ហើយក៏ត្រូវរថយន្ត ប្រាដូមួយគ្រឿង ពណ៌ស្ក ពាក់ស្លាកលេខបាត់ដំបង 2 A -6566 ធ្វើដំណើរក្នុងទិសដៅពីត្បូងទៅជើង បើកក្នុងល្បឿនលឿនបានជ្រុលទៅបុក ជនរងគ្រោះដែលកំពុងតែដើរឆ្លងផ្លូវបណ្តាលអោយស្លាប់ភ្លាមៗតែម្តង ។ ក្រោយពេលកើតហេតុ អ្នកបើកបរ រថយន្តបានចុះពីលើរថយន្តគេចខ្លួនបាត់ស្រម៉ោល ។
សពជនរងគ្រោះត្រូវបានសមត្ថកិច្ចទាក់ទងក្រុមគ្រួសារ មកទទួលយកទៅធ្វើបុណ្យតាមប្រពៃណីនៅឯស្រុកកំណើត ៕
