កំពង់ឆ្នាំង ៖ ក្រោយពីរាជរដ្ឋាភិបាលសម្រេចកាត់ឆ្វៀលដី ដែលប្រជាពលរដ្ឋរស់នៅ និងអាស្រ័យផលពិតប្រាកដ នៅក្នុងភូមិសាស្ត្រឃុំសំរោងសែន ស្រុកកំពង់លែង រួចមកហើយនោះ នៅពេលនេះមន្ត្រីជំនាញបានចុះវាស់វែងនិងធ្វើប័ណ្ឌកម្មសិទ្ធិជូនពួកគាត់ជាបន្តបន្ទាប់ ។
នៅថ្ងៃទី៦ ខែមិថុនា ឆ្នាំ២០២៣នេះ រដ្ឋបាលខេត្តកំពង់ឆ្នាំង បានប្រកាសបិទផ្សាយជាសាធារណៈ នូវឯកសារនៃការចុះបញ្ជីជាលក្ខប្រព័ន្ធ ភូមិចំនួន២ ក្នុងឃុំសំរោងសែន ស្រុកកំពង់លែង ។
លោក មុំ សារ័ត្ន ប្រធានក្រុមការងារចុះវាស់វែងដីធ្លី ជាលក្ខណៈប្រព័ន្ធបានឲ្យដឹងថា ភូមិសំរោងសែន និងភូមិប៉ប្រ៉ក ត្រូវបានក្រុមការងារចុះអនុវត្តនិតិវិធីតាមដំណាក់កាលនិមួយៗ ជាបន្តបន្ទាប់រហូតដល់ដំណាក់កាលបិទផ្សាយជាសាធារណៈ នៃការចុះបញ្ជីជាលក្ខណៈប្រព័ន្ធដែលមានចំនួន២៤០ក្បាលដី ។
លោកបញ្ជាក់ថា ការបិទផ្សាយនូវឯកសារ ជាសាធារណៈនេះ មានរយះពេល១៥ថ្ងៃ ដើម្បីឲ្យប្រជាពលរដ្ឋជាម្ចាស់ក្បាលដីទាំងអស់ មកពិនិត្យមើលឲ្យបានត្រឹមត្រូវ និងទុកឳកាសឲ្យអ្នកកាន់កាប់ ឬអ្នកពាក់ព័ន្ធធ្វើការតវ៉ាកែតម្រូវលើឯកសារ ដោយមានមន្ត្រីជំនាញ នៅចាំពន្យល់ ទទួលបណ្តឹង និងធ្វើការដោះស្រាយជូន ។
ប្រជាពលរដ្ឋនៅក្នុងឃុំសំរោងសែន ស្រុកកំពង់លែង បានសំដែងនូវការសម្បាយរីករាយយ៉ាងខ្លាំង និងបានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល ដែលបានយកចិត្តទុកដាក់និងគិតគូដល់ប្រជាពលរដ្ឋ ក្នុងការផ្តល់ប័ណ្ឌកម្មសិទ្ធិដីធ្លី ជូនដល់ពួកគាត់ ៕
