យោងតាមសេចក្តីប្រកាសព័ត៌មាន ស្តីពីលទ្ធផលនៃសម័យប្រជុំពេញអង្គគណៈរដ្ឋមន្រ្តី កាលពីថ្ងៃទី៩ ខែកញ្ញា រាជរដ្ឋាភិបាល បានសម្រេចផ្អាកការប្រារព្ធព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក សម្រាប់ថ្នាក់ជាតិ ឆ្នាំ២០២២នេះ។
ដ្បិតតែផ្អាករៀបចំព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក សម្រាប់ថ្នាក់ជាតិ ប៉ុន្តែចំពោះការរៀបចំពិធី បុណ្យអុំទូកកម្សាន្ត សប្បាយរបស់ប្រជាជននៅតាមបណ្តារាជធានីខេត្តនានាទូទាំងប្រទេស គឺអាចប្រព្រឹត្តទៅបានតាម លទ្ធភាព ជាក់ស្ដែង ដោយគិតទាំងពិធីបុណ្យភ្ជុំបិណ្ឌនៅខែកញ្ញា និងពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅខែវិច្ឆិកា ដើម្បីបង្កភាពសប្បាយរីករាយជូនប្រជាពលរដ្ឋ បង្កើន បរិយាកាសទេសចរណ៍ ក៏ដូចជាផ្ដល់ឱកាស នៃការរកប្រាក់ចំណូលដល់ បងប្អូនប្រជាពលរដ្ឋផងដែរ។
គួរបញ្ជាក់ថា ដោយសារតែបារម្ភពីការឆ្លងរីករាលដាលនៃជំងឺកូវីដ១៩ ពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ក៏បានសម្រេចផ្អាកដូចគ្នានេះដែរ កាលពីឆ្នាំ២០២០ និងឆ្នាំ២០២១ កន្លងទៅ ។ ប៉ុន្តែរដ្ឋាភិបាល បានអនុញ្ញាតអោយប្រជាពលរដ្ឋ មន្ត្រីរាជការ និងបុគ្គលិកក្រុមហ៊ុនឯកជនទាំងអស់បានឈប់សម្រាក ស្របតាមប្រកាសរបស់ក្រសួងការងារនិងបណ្តុះបណ្តាលវិជ្ជាជីវៈ៕
