រដ្ឋបាលស្រុកសាមគ្គីមានជ័យ បានឲ្យដឹងថា តាមរបាយការណ៍របស់រដ្ឋបាលឃុំឈានឡើង ឃុំស្វាយ និងឃុំស្វាយជុក ស្រុកសាមគ្គីមានជ័យ ខេត្តកំពង់ឆ្នាំងនៅថ្ងៃទី២១ ខែកក្កដា ឆ្នាំ២០២២ ស្ថានភាពទឹកទំនប់អន្លង់ជ្រៃមានសភាពឡើងខ្លាំង កម្រិតទឹកបានឡើងដល់កម្ពស់ ៣,៤០ម៉ែត្រ នៅសល់តែ១តឹកទៀតនឹងដល់កម្រិតត្រូវប្រកាសអាសន្ន ហើយទ្វារទឹកមានចំនួន ៦ទ្វារ ឥឡូវបើកអស់ ៥ទ្វារ ទឹកនៅតែមានសភាពឡើងបន្ថែមទៀត និងស្ថានភាពទឹកនៅទំនប់តាវ៉ាយទឹកឡើងខ្ពស់ខ្លាំងហៀត្រចៀកទំនប់ខាងត្បូង ទ្វារទឹកធំត្រូវបើកចំនួន ១ទ្វារ ដោយសារតែស្ថានភាពទឹកភ្លៀងចេះបន្តធ្លាក់ច្រើនជាលំដាប់។
រដ្ឋបាលស្រុកសាមគ្គីមានជ័យ ប្រកាសឲ្យប្រជាពលរដ្ឋបង្កើនការប្រុងប្រយ័ត្ន ជាពិសេសមនុស្ស សត្វ ផ្ទះសម្បែង និងត្រៀមបង្ការការពារគ្រោះមហន្តរាយដែលអាចកើតមានជាយថាហេតុ៕
