ស្រុកអង្គរជុំ ក្នុងខេត្តសៀមរាប បានក្លាយជាស្រុកដំបូងគេក្នុងខេត្តដែលសម្រេចបានជាស្រុកបញ្ឈប់ការបន្ទោបង់ពាសវាលពាសកាល។ ដើម្បីបង្ហាញជាសក្ខីភាព នៃការខិតខំប្រឹងប្រែងរបស់អាជ្ញាធរ និង អង្គការដៃគូនានា ពិធីប្រកាសទទួលស្គាល់ជាផ្លូវការ បានប្រារព្ធឡើងនៅថ្ងៃទី១០ ខែកុម្ភៈ ឆ្នាំ២០២២។
គណៈកម្មាធិការវាយតម្លៃដែលមានសមាសភាពមកពីក្រសួងអភិវឌ្ឍន៍ជនបទមន្ទីរអភិវឌ្ឍន៍ជនបទ និងតំណាងស្រុកជិតខាងបានធ្វីការវាយតម្លៃស្រុកអង្គរជុំស្រុក ជាស្រុកដំបូងបំផុត ដែលបញ្ឈប់ការបន្ទោបង់ពាសវាលពាសកាល (ODF) ទាំងស្រុងកាលពីថ្ងៃទី២៣ ខែធ្នូ ឆ្នាំ២០២១ កន្លងទៅ។ លក្ខខណ្ឌជម្រុញឱ្យស្រុកអង្គរជុំ បានក្លាយជាស្រុកបញ្ឈប់ការបន្ទោបង់ពាសវាលពាសកាលទាំងស្រុងដោយសារប្រជាពលរដ្ឋក្នុងឃុំនីមួយៗយល់ដឹងខ្ពស់ពីបញ្ហាអនាម័យនិងមានទម្លាប់អនុវត្តអនាម័យ ក្រោយពីបានចូលរួមយល់ដឹងអំពីការផ្សព្វផ្សាយបំផុសអំពីអនាម័យ។
លោក យី គីមថាន នាយករងប្រចាំប្រទេសផ្នែកកម្មវិធីនៃអង្គការភ្លែនអន្តរជាតិកម្ពុជា បានលើកឡើងថា«ស្រុកអង្គរជុំក្លាយជាស្រុកដំបូងបំផុតនៅខេត្តសៀមរាបដែលបញ្ឈប់ការបន្ទោបង់ពាសវាលពាសកាល (ODF)ក៏ដោយសារកិច្ចសហការល្អពីអាជ្ញាធរភូមិ ឃុំ ស្រុកជាមួយដៃគូអភិវឌ្ឍន៍នានា។ ឃុំបានវិភាគថវិកាមូលនិធិឃុំក្នុងការចូលរួមបដិភាគសាងសង់បង្គន់និងផ្សព្វផ្សាយពីអនាម័យ។ ឃុំនិងស្រុកបានលើករបៀបវារៈការងារទឹកស្អាតនិងអនាម័យក្នុងកិច្ចប្រជុំក្រុមប្រឹក្សាជាប្រចាំខែ ដោយមានការគាំទ្របច្ចេកទេសពីក្រសួងនិងមន្ទីរអភិវឌ្ឍន៍ជនបទអង្គការបណ្តុះកុមារ និងអង្គការភ្លែនអន្តរជាតិបានចូលរួម និងផ្សព្វផ្សាយលើកកម្ពស់អនាម័យនៅស្រុក»។
លោកបន្តថា «ការលើកកម្ពស់អនាម័យមិនមែនគ្រាន់តែជាការសាងសង់បង្គន់ប៉ុណ្ណោះទេ ប៉ុន្តែវាជាការអប់រំដើម្បីផ្លាស់ប្តូរទម្លាប់បញ្ឈប់ការបន្ទោបង់ពាសវាលពាសកាលផឹកទឹកដែលមានសុវត្ថិភាពនិងមានទម្លាប់លាងសម្អាតដៃជាមួយសាប៊ូជានិច្ច។ ការរក្សាស្ថានភាពបញ្ឈប់ការបន្ទោបង់ពាសវាលពាសកាលមានសារៈសំខាន់បំផុតដែលទាមទារឲ្យមានការប្តេជ្ញាចិត្តខ្ពស់និងភាពជាអ្នកដឹកនាំ និងសកម្មភាពយ៉ាងសកម្មរបស់អាជ្ញាធរខេត្ត ក្រសួងអភិវឌ្ឍន៍ជនបទ មន្ទីរអភិវឌ្ឍន៍ជនបទខេត្ត ស្រុក និងឃុំដើម្បីធានាថាសមិទ្ធិផលនេះមានផលប៉ះពាល់យូរអង្វែងដល់ប្រជាពលរដ្ឋ»។
គួរបញ្ជាក់ថា ស្រុកអង្គរជុំ គឺជាស្រុកមួយក្នុងចំណោមក្រុង ស្រុកទាំង ១២ នៃខេត្តសៀមរាប មានឃុំចំនួន ៧ឃុំ មាន ៨៦ភូមិនិងមានប្រជាជនរស់នៅចំនួនជាង ១៥៧០០ ខ្នងផ្ទះ។ ក្នុងឆ្នាំ ២០១៦ មានតែ៤៥%នៃគ្រួសារទាំងអស់ប៉ុណ្ណោះដែលមានលទ្ធភាពប្រើប្រាស់បង្គន់។ ការយល់ដឹង របស់ប្រជាជនអំពីសារៈសំខាន់នៃការអនុវត្តអនាម័យនៅមានកម្រិតទាប ការបន្ទោបង់ពាសវាលពាសកាលជារឿងធម្មតា។ បន្ទាប់ពីការជម្រុញនិងផ្សព្វផ្សាយ រួមជាមួយកិច្ចសហការល្អរវាងអាជ្ញាធរមូលដ្ឋាន សហគមន៍ និងអ្នកពាក់ព័ន្ធទាំងអស់ក្នុងរយៈពេល៤ឆ្នាំ ប្រជាជនទាំងអស់នៅក្នុងស្រុកមានបង្គន់ប្រើប្រាស់គ្រប់ៗគ្នា។
