កំពង់ឆ្នាំង ៖ រថយន្តពាក់ស្លាកលេខខេមរភូមិន្ទមួយគ្រឿង ដែលកំពុងបើកក្នុងល្បឿនលឿនបានរេចង្កូតទៅបុករះម៉ូតូ៣គ្រឿងនិងកង់១គ្រឿងនិងរបួសមនុស្ស៤នាក់ ។ ហេតុគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៤រសៀលថ្ងៃទី២១ ខែមករា ឆ្នាំ២០២០ នៅលើកំណាត់ផ្លូវជាតិលេខ៥ ចន្លោះបង្គោលគីឡូម៉ែត្រ៨៧.៨៨ ខាងមុខវិទ្យាល័យព្រះបាទសុរាម្រឹត ក្នុងភូមិសាស្ត្រភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ។
ប្រភពនៅកន្លែងកើតហេតុ បានឲ្យដឹងថា នៅវេលាកើតហេតុខាងលើ គេឃើញរថយន្តមួយគ្រឿងម៉ាកនីសាន់ណាវ៉ារ៉ា ពណ៌ស្លែពាក់ស្លាកលេខខេមរភូមិន្ទ 2.74 36 បើកបរតាមបណ្តោយផ្លូវជាតិលេខ៥ ក្នុងទិសដៅពីត្បូងទៅជើង ក្នុងល្បឿនយ៉ាងលឿនហើយបានរេចង្កូតទៅបុកម៉ូតូរបស់សិស្សចំនួន៣គ្រឿង កង់១គ្រឿង និង របួសមនុស្សចំនួន៤នាក់ ដែលពួកគេកំពុងឈប់នៅលើចិញ្ចើមផ្លូវបំរ៉ុងទៅម្ខាងទៀត ។
ក្រោយពេលកើតហេតុអ្នកបើកបររថយន្តបង្ក ឈ្មោះលី ហួត ឋានន្តរសក្តិអនុសេនីយ៍ឯក បម្រើការងារនៅអង្គភាពវិស្វកម្មក្រសួងការពារជាតិ ត្រូវបានសមត្ថកិច្ចឃាត់ខ្លួនពិនិត្យជាតិអាល់កុលផងដែរ។ រីឯជនរងគ្រោះត្រូវបានគេបញ្ជូនទៅព្យាបាល នៅមន្ទីរពេទ្យខេត្តកំពង់ឆ្នាំង ៕
