កំពង់ឆ្នាំង៖ ក្រោមការសម្របសម្រួល និងទំនាក់ទំនងគ្នារវាងមន្ទីរសុខាភិបាលខេត្តកំពង់ឆ្នាំង និងការិយាល័យស្រុកប្រតិបត្តិកំពង់ត្រឡាច បានសម្រេចយកពលករមកពីប្រទេសថៃ ចំនួន៩នាក់ ដែលមិនបានធ្វើចត្តាឡីស័ក នៅតាមទីតាំងកំណត់នៅតាមច្រកព្រំដែន យកទៅធ្វើចត្តាឡីស័កនៅមណ្ឌលសុខភាពអភិវឌ្ឍន៍ ស្រុកទឹកផុស។ នេះបើតាមការបញ្ជាក់របស់ លោក ប្រាក់ វ៉ុនប្រធានមន្ទីរសុខាភិបាលខេត្តកំពង់ឆ្នាំង។
លោក ប្រាក់ វ៉ុន បានអោយMYFM News ដឹងថា នៅវេលាម៉ោង១១និង៤០ នាទីយប់ថ្ងៃទី១៥ ខែកុម្ភះឆ្នាំ២០២១ រថយន្តការិយាល័យស្រុកប្រតិបត្តិ ១ គ្រឿង និង រថយន្តមណ្ឌលសុខភាពអភិវឌ្ឍន៍ស្រុកទឹកផុស បានមកដល់គោលដៅ ឃុំពាម ស្រុកសាមគ្គីមានជ័យ ដើម្បីដឹកពលករមកពីប្រទេសថៃទាំង៩ នាក់ ទៅធ្វើចត្តាឡីស័កនៅមណ្ឌលសុខភាពអភិវឌ្ឍន៍ ស្រុកទឹកផុស។
ដោយឡែក រដ្ឋបាលឃុំពាមនិង នាយប៉ុស្តិ៍នគរបលរដ្ឋបាលឃុំ ក៏បានពន្យល់អំពីសារប្រយោជន៍នៃការធ្វើចត្តាឡីស័កហើយការងារនេះ មិនមែនអាជ្ញាធរមូលដ្ឋានធ្វើបាបបងប្អូននោះទេ គឺដើម្បីការពារសុខសុវត្ថិភាពបងប្អូន ក្រុមគ្រួសារ និងសហគមន៍យើងទាំងអស់គ្នា។ជាមួយគ្នានោះបងប្អូនពលករទាំង៩រូប បានឯកភាព និង យល់ស្របតាមការណែនាំរបស់អាជ្ញាធរមូលដ្ឋានសុខចិត្តទៅធ្វើ ចត្តាឡីស័ក តាមគោលដៅដែលអាជ្ញាធរកំណត់ ៕
