កំពង់ឆ្នាំង ៖ រូបសំណាកឆ្នាំង ដែលជានិមិត្តរូបរបស់ខេត្តកំពង់ឆ្នាំងថ្មីមួយទៀត នឹង ត្រូវស្ថាបនាឡើង នៅលើផ្ទៃដីជិត១ម៉ឺនម៉ែក្រឡា ត្រង់ចំណុចច្រមុះជ្រូកផ្លូវវៀងក្រុង ក្នុងភូមិសាស្ត្រឃុំជ្រៃបាក់ ស្រុករលាប្អៀរ ។
រូបសំណាកឆ្នាំងថ្មីនេះ ត្រូវបានរដ្ឋបាលខេត្តកំពង់ឆ្នាំង រៀបចំធ្វើពិធីសែនក្រុងពលី បញ្ចុះបឋមសិលា ស្ថាបនាឡើងនៅថ្ងៃទី២៦ ខែកញ្ញា ឆ្នាំ២០២០ ក្រោមអធិបតីភាពឯកឧត្តមឈួរ ច័ន្ទឌឿន អភិបាលខេត្តកំពង់ឆ្នាំង និង លោកជំទាវ ។
នៅក្នុងពិធីនេះឯកឧត្តមឈួរ ច័ន្ទឌឿនអភិបាលខេត្តកំពង់ឆ្នាំង បានមានប្រសាសន៍បញ្ជាក់ថា រូបសំណាកឆ្នាំងថ្មីនេះ មានកម្ពស់ដល់ទៅ១៤ម៉ែត្ត នឹងស្ថាបនាឡើង នៅចំកណ្តាលសួនច្បារមួយមានផ្ទៃដីប្រមាណជិត១ម៉ឺនម៉ែត្រ ក្រឡា។ សួនច្បារថ្មីនេះ ជាសួនច្បារមួយដែលមានភាពទាក់ទាញការចាប់អារម្មណ៍ ពីអ្នកដំណើរឆ្លងកាត់ខេត្តកំពង់ឆ្នាំង ។
ឯកឧត្តមអភិបាលខេត្តបានបញ្ចាក់ទៀតថា គម្រោងធ្វើឱ្យប្រសើរឡើងផ្លូវជាតិលេខ៥នេះ មានប្រវែងសរុប៣៦៦គីឡូម៉ែត្រ ដែលភ្ជាប់រាជធានីភ្នំពេញទៅតំបន់ជាយដែនប៉ែកខាងលិចប្រទេស ដោយឆ្លងកាត់ខេត្តកំពង់ឆ្នាំង ពោធិ៍សាត់ បាត់ដំបង និង ខេត្តបន្ទាយមានជ័យ ។
គម្រោងស្ថាបនានេះ ត្រូវបានបែងចែក ជាបីផ្នែកធំៗរួមមាន៖ ផ្នែកខាងជើង ផ្នែកកណ្តាល និង ផ្នែកខាងត្បូង ដោយពង្រីកកំណាត់ផ្លូវជាតិដែលមានស្រាប់នេះ ចាប់ពី២គន្លងទៅ៤គន្លង និង មានសួនច្បារចំ កណ្តាល ។
ឯកឧត្តមឈួរ ច័ន្ទឌឿន បានឲ្យដឹងទៀតខេត្តកំពង់ឆ្នាំង គឺជាខេត្តមួយដែលមានចំណាត់ថ្នាក់ នៅក្នុងគោលដៅភ្ញៀវទេសចរណ៍មកលេងច្រើនផងដែរ ទាំងនេះដោយសាតែ ខេត្តមានការអភិវឌ្ឍន៍ជាបន្តបន្ទាប់ ពិសេសហេដ្ឋា
រចនាសម្ព័ន្ធផ្លូវថ្នល់ ទៅដល់តំបន់គោលដៅទេសចរណ៍ផងដែរ ៕
