រដ្ឋមន្រ្ដី​ក្រសួង​ព័ត៌មាន​ ជំរុញ​ដល់​អាជ្ញាធរ​ឃុំ និង​ស្រុក​កោះ​សូ​ទិន​ ត្រូវយក​ចិត្តទុក​ដាក់​ចំពោះ​​បញ្ហា​ជីវភាព​របស់​បងប្អូន​ប្រជាពលរដ្ឋក្រី​ក្រ​នៅ​តាម​មូលដ្ឋាន​របស់​ខ្លួន

ក្នុងឱកាសចុះបំពេញបេសកកម្មការងារនៅខេត្តកំពង់ចាម ឯកឧត្ដម ខៀវ កាញារីទ្ធ រដ្ឋមន្រ្តី ក្រសួង​ព័ត៌មាន​បានជំរុញ​ដល់​ថ្នាក់​ដឹក​មន្ត្រីក្រោម​ឱវាទទាំងអស់នៅក្នុង​ឃុំល្វេ ក៏ដូចជា​នៅក្នុង ស្រុក​កោះសូទិន​ទាំងមូល ត្រូវ​យក​ចិត្តទុក​ដាក់ចំ​ពោះ​បញ្ហា​ជីវភាព​របស់​​បង​ប្អូនប្រជាពលរដ្ឋ​ក្រី​ក្រនៅតាមមូលដ្ឋានរ​បស់ខ្លួន ហើយ​អ្វីដែល​សំខាន់ត្​រូវចងចាំ​ការណែ​នាំ​​របស់​ប្រមុខ​រាជ​រដ្ឋាភិ​បា​ល​​ ​សម្តេច​តេជោ​ ហ៊ុន សែន ដែលបាន​បញ្ជាក់ថា មន្ត្រី គឺ​​ជាខ្ញុំបម្រើ​​ដ៏ស្មោះ​ត្រង់រ​បស់​ប្រជា​ជ​ន មិន​មែ​ន​ជា​ចៅ​ហ្វាយ របស់​ប្រជា​ជន​ ​នោះ​ទេ​។​ថ្លែង​ក្នុងពិធីបញ្ចុះបឋម​សិលាក​សាង​​អគារ​បំពេញ​ការងារ​ រួមជាមួយស​មិទ្ធផល​នានា និង​ជួប​សំណេះ​សំណាល​ជាមួយ អា​ជ្ញា​ធរ​ដែន​ដី និងបងប្អូនប្រជា​ពលរដ្ឋ ក្នុងឃុំល្វេ ស្រុក​កោះ​​​​សូ​ទិន ខេត្ត​កំពង់​ចាម នៅព្រឹក​ថ្ងៃទី០៤ ខែ​កក្កដា ឆ្នាំ២០​២០ ឯក​ឧត្ដម ខៀវ កាញារីទ្ធ បាន​លើកឡើង​នូវប្រសាសន៍ផ្តាំផ្ញើសាកសួរសុខទក្ខ ពីសំណាក់​សម្តេចអគ្គមហាសេនាបតី​​តេជោ ហ៊ុន សែន ដែល​ជា​និច្ចកាល តែងតែយក​ចិត្តទុកដាក់ចំពោះសុខទុក្ខ​របស់​បងប្អូន​ប្រជា​​​ពលរដ្ឋ ជាពិសេសអ្នក​រស់​នៅ​ទីជនបទ តាម​រយៈ​ការ​ជួយកសាងនូវរាល់សមិទ្ធផលនានា ដែល​បម្រើឱ្យសេចក្តីត្រូវការប្រើប្រាស់ប្រចាំថ្ងៃ។ ឯកឧត្ដមបានលើកឡើងថា អ្វី​ដែល​សំខាន់​ និងជាការគិតគួរខ្ពស់បំផុតនោះ គឺដាក់ឱ្យដំណើរការអនុវត្តន៍កម្មវិធីផ្តល់សាច់ប្រាក់ជូន​ពល​រដ្ឋ​ក្រីក្រ និង​ងាយ​រងគ្រោះ​ដោយសារ​ជំងឺកូវីដ-១៩ ដែលកម្មវិធីនេះ ជាវិធានការជំនួយ​សង្គម​របស់​រាជរដ្ឋាភិបាល​សំដៅ​ជួយ​សម្រួល​ជីវភាព​ប្រចាំថ្ងៃជូន​ដល់គ្រួសារ​ក្រីក្រនិង​ងាយរង​គ្រោះ ដែលមានប័ណ្ណសមធម៌​ទូទាំងប្រទេស។ ទន្ទឹមនេះ រាជរដ្ឋាភិបាល​បាន​ផ្តោត​ការយក​ចិត្ត​ទុក​​​ដាក់​បន្ថែម ចំពោះកុមារ​អាយុក្រោម ៥ឆ្នាំ ជនមាន​ពិការភាព ជនចាស់ ជរា អាយុ​ចាប់ពី ៦០ ឆ្នាំឡើង និងអ្នក​មា​ន​ផ្ទុក​មេរោគ​អេដស៍​ នៅក្នុង​គ្រួសារ​ក្រីក្រ។

ឯកឧត្ដម​រដ្ឋមន្រ្ដី បាន​បន្ដថា បច្ចុប្បន្ន គ្រួសារដែលមានប័ណ្ណសមធម៌ (ទាំងក្រ-១ និង​ក្រ-២) មាន​ប្រមាណ​ជាង ៥៦ ម៉ឺន​គ្រួសារ ដែល​រាជរដ្ឋាភិបាល​ត្រូវចំណាយថវិកា​ប្រមាណជាង ប្រមាណ ២៥ លានដុល្លារ ក្នុងមួយ​ខែៗ សម្រាប់​បើកផ្តល់​ជូន។ ជាមួយ​នេះ​ដែរ​ អ្វីដែល​​សំខាន់​នោះ គឺការបង្កើតបេឡា​ជាតិសន្តិសុខសង្គម(ប.ស.ស) ក្នុងការ​ធានា​សន្តិសុខ​​ប្រាក់​​ចំណូល​ជា​មូល​ដ្ឋាន​ដល់​ក​ម្មករ និយោជិត ក៏ដូចជាមន្រ្តីរាជការ កងកម្លាំងប្រដាប់​អាវុធ ពិសេស​​នៅពេល​ចូលពិនិត្យ និងព្យាបាល​ជំងឺ នៅ​មន្ទីរ​ពេទ្យ​រដ្ឋ និងឯកជនដែលជាដៃគូជា​មួយ ប.ស.ស គឺមិនបាច់ បង់ប្រាក់នោះទេ គឺរដ្ឋជាអ្នកចេញថ្លៃឱ្យ។ សម្រាប់ប្រជាពលរដ្ឋ​ដែល​​មាន​​ប័ណ្ណសមធម៌ គឺពិនិត្យព្យាបាលជំងឺ នៅមន្ទីរមិនអស់លុយនោះទេ ហើយអ្នកទៅ​កំដរ​​អ្នកជំងឺ ក៏ទទួលបាន ថវិកាផងដែរ។

ក្នុងឱកាសនោះដែរ ឯកឧត្តម ខៀវ កាញារីទ្ធ បានធ្វើការរម្លឹកឡើងវិញដល់ អាណា​​ព្យាបាលទាំងអស់​ត្រូវធ្វើយ៉ាងណា បន្ត​អប់​រំ​ណែ​នាំ កូន ចៅ ឱ្យចៀសឆ្ងាយពីការ ប្រើ​ប្រាស់​​គ្រឿងញៀន ដែលបំផ្លាញ​សុខភាព បំផ្លាញ ខួរក្បាល និងអនាគត​​ខ្លួនឯង ក៏​ដូច​ជា គ្រួសារ ពិសេស​គឺធ្វើឱ្យភូមិ ឃុំ គ្មាន​សុវត្ថិភាព​ថែមទៀតផង។ លើស​ពីនេះ​ទៀត សូមចៀស​​ឱ្យឆ្ងាយ​ពី​គ្រឿង​ញៀន​ទាំងអ​ស់​គ្នា ជា​ពិសេស​យុវជន ត្រូវមករួមគ្នា​ធ្វើការ​ជាក្រុម ធ្វើអ្វីៗ​ដែល​​មាន​ផល​ប្រយោជន៍​សម្រាប់​គ្រួសារ និង​សង្គម​ជាតិ៕

ប្រភព៖ AKP

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង