កំពង់ឆ្នាំង ៖ លោកឧត្តមសេនីយ៍ទោ ខូវ លី ស្នងការនគរបាលខេត្តកំពង់ឆ្នាំង អំពាវនាវឲ្យប្រជាពលរដ្ឋ ចូលរួមគោរពច្បាប់ចរាចរណ៍ផ្លូវគោកដោយស្មារតីភ្ញាក់រលឹក ដើម្បីជៀសផុតពីការផាកពិន័យរបស់កម្លាំងសមត្ថកិច្ចនគរបាននិង កាត់បន្ថយ
ករណីគ្រោះថ្នាក់ចរាចរណ៍ឲ្យនៅកម្រិតទាបបំផុត ។ ការអំពាវនាវរបស់លោកឧត្តមសេនីយ៍ទោ ខូវ លី បែបនេះធ្វើឡើងក្នុងពេលចុះពិនិត្យមើលតាមគោលដៅរឹតបណ្តឹងការអនុវត្តច្បាប់ផ្លូវគោក នាព្រឹកថ្ងៃទី១ ខែឧសភា ឆ្នាំ២០២០ ។
លោកស្នងការ បានបន្ថែមថា លោកនឹងដាក់ពិន័យ ឬចាត់វិធានការតាមផ្លូវច្បាប់ឱ្យធ្ងន់ធ្ងរ ចំពោះកងកម្លាំងនគរបាលចរាចរណ៍រូបណា ដែលហ៊ានប្រព្រឹត្ត ឬអនុវត្តន៍ច្បាប់ខុសពីក្រមសីលធម៌វិជ្ជាជីវៈ ក្នុងពេលបំពេញភារកិច្ចរបស់ខ្លួន ។
លោកឧត្តមសេនីយ៍ត្រី កេត យ៉ុង ស្នងការរងនគរបាលខេត្តកំពង់ឆ្នាំង បានឲ្យដឹងថា ចំពោះការរឹតបណ្តឹង នៃការអនុវត្តច្បាប់ចរាចរណ៍ផ្លូវគោក ខេត្តកំពង់ឆ្នាំងបានដាក់គោលដៅចំនួន១០កន្លែង កម្លាំងនគរបាលចរាចរណ៍ចំនួន១៤០នាក់ នៅក្នុងក្រុងនិងស្រុកទាំង៨ ។
លោកឧត្តមសេនីយ៍ត្រី កេត យ៉ុង បានបញ្ជាក់ថា ការអនុវត្តអនុក្រឹត្យ ចាប់ពីថ្ងៃទី១ ខែឧសភានេះ គឺផ្តោតតែលើបទល្មើសចរាចរណ៍ដែលបង្កគ្រោះថ្នាក់ខ្ពស់ ដែលក្នុងនោះមានម៉ូតូ៧បទល្មើស និងរថយន្ត៩បទល្មើសប៉ុណ្ណោះ ហើយនគរបាលចរាចរណ៍ នឹងមិនមានការឃាត់រថយន្តដែលបើកបរគោរពច្បាប់តាមដងផ្លូវនោះឡើយ ៕
